جاپونيا ۇكىمەتى ءوز ەلىنىڭ اتوم ەنەرگەتيكاسىن قالپىنا كەلتىرۋ باعىتىندا ماڭىزدى قادام جاساپ، قۋاتى بويىنشا الەمدەگى ەڭ ءىرى اتوم ەلەكتر ستانتسياسىنىڭ بولىگىن ىسكە قوستى، دەپ حابارلايدى "ادىرنا" ۇلتتىق پورتالى.
رەاكتور نيگاتا پرەفەكتۋراسىنداعى ستانتسيادا ورنالاسقان جانە Tokyo Electric Power Company (Tepco) كومپانياسىنا تيەسىلى.
ەنەرگوبلوك 2026 جىلعى 9 اقپاندا ون جىلدان استام ۋاقىتقا توقتاعاننان كەيىن قايتا ىسكە قوسىلدى. ونىڭ توقتاۋى 2011 جىلى «فۋكۋسيما» اەس-ىندە بولعان اپاتتان كەيىن ورىن العان، سول كەزدە شامامەن 15 مەترلىك تسۋنامي سالدارىنان ەلەكترمەن جابدىقتاۋ جانە سالقىنداتۋ جۇيەلەرى ىستەن شىققان ەدى.
Tepco وكىلدەرىنىڭ حابارلاۋىنشا، ستانتسيا جابدىقتارىنىڭ بۇتىندىگىن بۋداعى ناقتى جۇمىس كەزىندە تەكسەرۋدى جالعاستىرادى.
قۋاتى 1356 مەگاۆاتت بولاتىن جاڭارتىلعان رەاكتور جەرگىلىكتى ۋاقىت بويىنشا ساعات 14:00-دە ىسكە قوسىلدى.
باستاپقىدا رەاكتور 2026 جىلعى 21 قاڭتاردا كەشكە ىسكە قوسىلعان، بىراق 22 قاڭتاردا باسقارۋ تاياقشالارىن باقىلاۋ جۇيەسىندەگى دابىل ىسكە قوسىلىپ، ولاردىڭ بىرەۋىن شىعارۋ توقتاتىلعان. سول سەبەپتى ەنەرگوبلوكتىڭ قايتا ىسكە قوسىلۋى توقتاتىلىپ، دابىلدىڭ سەبەبى تەكسەرىلگەن. Tepco وكىلدەرى رەاكتورداعى قىسىم بىرتىندەپ كوتەرىلۋىن جانە ەلەكتر ەنەرگياسىن ءوندىرۋ مەن تاراتۋ 16 اقپاننان باستالاتىنىن حابارلادى.
