" دۇمشە موللا ەل بۇزار"- دەگەندى قازاق باياعىدا ايتقان. سول دۇمشەلەر ءالى بار ەكەن. ءتىپتى كوپ پە دەيمىن. ويتكەنى الەۋمەتتىك جەلىلەردە مەشىتتە، مەدرەسەدە ۋاعىز ايتىپ جاتقان موللا- يمامداردىڭ ۆيدەولارىن ءجيى كورىپ قالامىز. كوبى قمدب - ىنىڭ سارابىنان وتكەندەر. ياعني ءدىني باسقارمانىڭ وكىلدەرى.
ال ەندى وسىلار جاماعاتقا نە ايتىپ ءجۇر دەگەنگە كەلەر بولساق. ايتىلىپ جۇرگەن داعۋاتتارىنىڭ كوبىسى تەك ولىمگە، قابىر ازابىنا، ونداعى پەرىشتەلەردىڭ سۇراعىنا، توزاقتىڭ قورقىنىشتى سۋرەتىنە، كۇنالاردىڭ تۇرلەرىنە، و دۇنەيەنىڭ ازابىنا قاتىستى بولىپ كەلەدى.
وسىندا ءبىر جاس يمام جاماعاتقا " ولگەندە سەنىڭ بۇل دۇنيەدەگى ابىروي- اتاعىڭ، العان ماراپاتىڭ، وقىعان ءبىلىمىڭ تۇككە كەرەگى جوق" دەپ كەسىپ ايتتى. جارايدى. ونىسىنا كەلىسەلىك. ولگەسىن ءبىر بوقسىڭ. ول " دانىشپاننىڭ" نەگىزگى ايتپاعى مىناۋ بولدى: " وقۋ- ءبىلىم ىزدەمە، باكالاۆر- ماگيستراتۋرادا وقىما، عىلىممەن اينالىسپا، قۇدايعا ونىڭ تۇككە كەرەگى جوق، قابىردەگى ءۇش سۇراققا دايىن بولساڭ بولدى. وسىمەن تامام". بۇل يمامسىماق تاس قاراڭعى نادان ەكەن. ءوز ناداندىعىمەن وزگە جۇرتتى ناداندىققا شاقىرىپ وتىر. اۋەلى وسى سوزىمەن يسلامنىڭ وزىنە قايشى كەلىپ وتىر.
" قىتايدان بولسا دا ءىلىم- عىلىم ىزدە", " و دۇنيەدە مەنىڭ قاتارىمدا وقىعاندار تۇرادى"- دەگەن حاديستەر بار ەمەس پە ەدى؟ يسلام ءبىلىمدى، عىلىمدى جوققا شىعارماعان. قىسقاسى الگى موللانىڭ ايتۋىنشا قابىردەگە ءۇش سۇراققا عانا دايىن بولساڭ بولدى ەكەن. وسىندايلارعا يلاناتىن، سەنەتىن، باس شۇلعيتىن قازاق بارشىلىق. ءوزى نادان وزگەنى دە نادان دەپ ويلايدى- اۋ. ءدىني ساۋاتى از، دۇنيەگە كوزقاراسى تولىق قالىپتاسپاعان جاستاردى ناداندىققا، ورەسىزدىككە، بىلىمسىزدىككە، ۇرەيلى پسيحيكاعا، قورقىنىشتى بولمىسقا قاراي تارتىپ جاتىر.
سيرياعا "جۇماق" ىزدەپ كەتكەندەردىڭ كوبى ساۋاتسىزدار ەكەنى بەلگىلى. راسىندا قازىر ءدىن، ونىڭ اينالاسىنداعىلار تۋرالى بىردەڭە ايتۋ قاۋىپتى بولىپ كەتتى. اۋزىڭدى اشىرمايدى. ورە تۇرەگەلەدى. سەنى نەشە ساققا جۇگىرتەدى. ماسەلە دىندە ەمەس، ماسەلە شالا ساۋاتتى دۇمشەلەردە بولىپ تۇر. قمدب وسىنداي ۋاعىزشىلاردى نەگە بايقامايدى؟ الدە ولاردىڭ دا دەڭگەيى وسىنداي ما؟ ۋاعىزدىڭ دا ۋاعىزى بار. يسلامنىڭ احلاق ءىلىم تۋرالى ايتىلسا ءسوز باسقا عوي. وسىنداي موللالارعا، ءدىني دوگمالىق ەكسپانتسياعا تىيىم كەرەك! " جاقسىنىڭ اتى، عالىمنىڭ حاتى ولمەيدى'- دەگەن قازاقتىڭ اتالى ءسوزى قايدا قالدى؟
ەربولات باياتۇلى
"ادىرنا" ۇلتتىق پورتالى
