يسپانيانىڭ ۆالەنسيا قالاسىندا 100 مىڭنان استام ادام ايماق باسشىسى كارلوس ماcوننىڭ وتستاۆكاسىن تالاپ ەتىپ نارازىلىق اكتسياسىنا شىقتى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
قازان ايىندا ايماقتاعى سۋ تاسقىنى سالدارىنان 200-دەن استام ادام قازا تاۋىپ، ونداعان ادام ءىز-ءتۇسسىز جوعالعان بولاتىن. نارازىلىق بىلدىرۋشىلەر بيلىك وكىلدەرىن تابيعي اپات تۋرالى دەر كەزىندە حاباردار ەتپەگەنى ءۇشىن ايىپتاپ وتىر.
نارازىلىقتار كەزىندە پوليتسيامەن قاقتىعىستار دا ورىن الدى. قالا اكىمى ماريا حوسە كاتاليا سىنعان تەرەزەلەر مەن ورتەنگەن جەرلەردىڭ فوتوسۋرەتتەرىن جاريالاپ، «ۆانداليزم شەشىم ەمەس» دەپ جازدى.
وتكەن اپتادا يسپانيا كورولى مەن كورولەۆاسىنا تابيعي اپاتتان ەڭ كوپ زارداپ شەككەن قالالاردىڭ ءبىرىن ارالاپ جۇرگەندە اشۋلانعان نارازىلىق بىلدىرۋشىلەر لاي اتقىلادى. سول سياقتى، پرەمەر-مينيستر پەدرو سانچەز دە جۇرتتىڭ نارازىلىعىنا تاپ بولىپ، تەز ارادا ەۆاكۋاتسيالاندى.
كونسەرۆاتيۆتى "حالىقتىق پارتيانىڭ" پروۆينتسيالىق اكىمشىلىگىن باسقاراتىن كارلوس ماسون ءوز ارەكەتتەرىنىڭ دۇرىستىعىن مالىمدەپ وتىر. ونىڭ ايتۋىنشا، ايماق بيلىگى ەل ۇكىمەتىنەن ءتيىستى ەسكەرتۋلەر الماعان جانە مۇنداي اۋقىمدى اپاتتى بولجاۋ مۇمكىن ەمەس.
يسپانيادا تابيعي اپاتتار كەزىندە جاۋاپكەرشىلىكتى ايماق بيلىگى كوتەرەدى، بىراق ولار مادريدتەن كومەك سۇراي الادى. يسپاندىق مەتەورولوگيالىق اگەنتتىك 25 قازان كۇنى ۋراگان تۋرالى ەسكەرتۋ شىعارعان، بىراق ۆالەنسيا بيلىگى تۇرعىندارعا ءموبيلدى تەلەفوندارعا ەسكەرتۋ حابارلامالارىن تەك سۋ تاسقىنى باستالاردان بىرنەشە ساعات بۇرىن عانا جىبەرگەن. وسىعان جاۋاپتى شەنەۋنىك SMS ارقىلى حابارلاۋعا بولاتىن جۇيە تۋرالى مۇلدەم بىلمەگەنىن ايتقان.
بۇعان دەيىن يسپانيالىقتاردىڭ قۇتقارۋشىلاردى تىم كەش ەسكەرتۋ جاسادى، بيلىك مۇنداي اپاتقا دايىن بولماي شىقتى دەپ ايىپتاعانى تۋرالى جازعان ەدىك.
