"جۇرەككە تيمەگەن كينونىڭ قۇنى كوك تيىن": تالعات تەمەنوۆ اقان ساتاەۆتى سىنعا الدى

3436
Adyrna.kz Telegram

بەلگىلى رەجيسسەر، قازاقستاننىڭ حالىق ءارتيسى تالعات تەمەنوۆ: "ساتاەۆ ءفيلمنىڭ ستسەناريىن ورىسشا وقىعان ايەلىنە جازدىرىپ، رۋحاني قىلمىس جاسادى" - دەپ  ارىپتەسى اقان ساتاەۆقا قاتىستى Hit-TV ارناسىنىڭ "مەنىڭ ءومىرىم" باعدارلاماسىنا سۇحبات بەرىپ، ءوز ويىمەن ءبولىستى.  بۇل تۋرالى "ادىرنا" ۇلتتىق پورتالى حابارلايدى.

تەمەنوۆتىڭ ايتۋىنشا، "قازاقفيلم" باسشىلارى الدىمەن، ءوز جاعدايىن، قالا بەردى قاسىنداعى جاقىندارىنىڭ جاعدايىن ويلايتىن جاعدايعا جەتكەن.

- اقان ساتاەۆ، جۇرگەنوۆتى بىتىرگەن جىگىت، اكەسىن دە، شەشەسىن دە بىلەمىن. بىراق مىنا سوڭعى ايەلىنە ستسەناريدى جازدىرىپتى. قانشاما عۇلامالارىمىز وتىر. سونىڭ قاسىندا ورىسشا ءبىتىرىپ، قازاقتىڭ ءبىر اۋىز ولەڭىن جاتقا بىلمەيتىن، قازاقتىڭ ءبىر جازۋشىسىنىڭ كىتابىن ءتول نۇسقادا وقىماعان ادامنىڭ مۇنداي دۇنيەگە بارۋى جانە وعان بىرنەشە ميلليون گونورار الۋى جانتۇرشىگەرلىك جاڭالىق بولدى مەن ءۇشىن. بۇل - دۇرىس ەمەس. بۇل ۇلتتى، ەلدى ويلاماعانى. قاراحان باسىن ويلاعان ادام. مۇنداي ادامدار قازاقتىڭ باسىنا كۇن تۋسا، وسىندا قالىپ، ەل قورعايدى، جەر قورعايدى دەپ ويلامايمىن، - دەپ پىكىر ءبىلدىردى تەمەنوۆ.

"توميريس" تاريحي ءفيلمىنىڭ ستسەناريىن تەمەنوۆ تە جازىپتى. الايدا ساتاەۆ ونى قابىلداماق تۇگىلى، قاراعان دا جوق، دەپ اشىندى رەجيسسەر.

- كينو دەگەن سەزىم، ول جۇرەككە ءتيۋى كەرەك. اسقار توقپانوۆتىڭ ءسوزى بار، "ەرىننەن شىققان ءسوز ەرىنگە، جۇرەكتەن شىققان ءسوز جۇرەككە جەتەدى" دەيدى. جۇرەككە تيمەگەن كينونىڭ قۇنى كوك تيىن. ارينە، بالالار، جاسوسپىرىمدەرگە پاتريوتيزم دەپ ۇرانداتىپ جاتادى. باسقا كورەتىن كينو بولماعاندىقتان، سوعان اپارامىز، - دەپ ءتۇسىندىردى تەمەنوۆ.

سونداي-اق، تەمەنوۆ ءفيلمنىڭ سيۋجەتىندە كەتكەن قاتەلىكتى اتادى.

"ۇلكەن قاتەلىگى، توميريس كيردىڭ باسىن قانعا مالىپ، ءوزى شابادى. نەگىزى قاسىنداعى ادامعا جاساتۋ كەرەك ەدى. بۇل - ء"توميريستى" جازعان بولات جانداربەكوۆ سياقتى عالىمداردىڭ الدىندا رۋحاني قىلمىس، قاتەلىك", - دەپ مالىمدەدى تەمەنوۆ.

"ادىرنا" ۇلتتىق پورتالى

پىكىرلەر