بۇگىن، 28 قازاندا 100 ملن تەڭگەگە بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ جازاسىن جەڭىلدەتۋدى ۇسىنعان ايەل ليۋدميلا گراچەۆانىڭ سوتى ءوتتى، دەپ حابارلايدى «ادىرنا» ءتىلشىسى.
ءىستى استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ قاتىسۋىمەن قارادى. سوتتالۋشى مامىر ايىندا «قۋاندىق بيشىمباەۆتىڭ ۇكىمىن جەڭىلدەتۋ ءۇشىن اپەللياتسيالىق ساتىعا پارا بەرۋگە بولادى» دەپ ءالميرا نۇرلىبەكوۆانىڭ ۇيىنە كەلىپ، 100 ملن تەڭگە سۇراعان. سول كۇنى كەشكە اتالعان سومانى بيشىمباەۆتىڭ اناسى ايەلگە بەرگەن.
«الايدا سوتتالۋشى ن-نىڭ اقشالاي قاراجاتىن الداۋ جولىمەن ۇرلاۋ جونىندەگى ارەكەتتەرى وعان تاۋەلسىز ءمان-جايلار بويىنشا، ياعني انتيكور قىزمەتكەرلەرىنىڭ قىلمىستىق ارەكەتتى اشكەرەلەۋىنە بايلانىستى سوڭىنا دەيىن جەتكىزىلگەن جوق. سوتتالۋشىنىڭ كىناسى كۋاگەرلەردىڭ ايعاقتارىمەن، ساراپتامالاردىڭ قورىتىندىلارىمەن، جاسىرىن تەرگەۋ ارەكەتتەرىنىڭ ناتيجەلەرىمەن، بەينەجازبامەن جانە قىلمىستىق ءىس بويىنشا باسقا دا ماتەريالدارمەن دالەلدەندى»،—دەپ ءتۇسىندىردى اۋدانارالىق سوت.
ايەلگە الاياقتىق جاساۋعا وقتالدى جانە اسا ءىرى مولشەردە پارا بەرۋگە يتەرمەلەدى دەگەن ايىپ تاعىلدى. سوت ليۋدميلا گراچەۆا كىنالى دەپ تانىپ، قىلمىستار جيىنتىعى بويىنشا 10 جىلعا باس بوستاندىعىنان ايىرۋعا شەشىم قابىلدادى.
