كاسپي تەڭىزى جاعالاۋىنان تابىلعان ءولى يتبالىقتار سانى 191-گە جەتتى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسى اۋىل شارۋاشىلىعى مينيسترلىگىنىڭ بالىق شارۋاشىلىعى كوميتەتى مالىمدەدى.
ۆەدومستۆونىڭ حابارلاۋىنشا، 2026 جىلعى 17 ءساۋىر ساعات 17:00-دەگى جاعداي بويىنشا تۇپقاراعان اۋدانى اۋماعىندا 191 يتبالىقتىڭ قاتتى ىدىراعان (2–4 دەڭگەي) ولەكسەسى انىقتالعان. اتالعان دەرەك اۋداندىق ىشكى ىستەر بولىمىندە تىركەلگەن.
وقيعا ورنىندا گيدروبيولوگيا جانە ەكولوگيا ينستيتۋتى ماماندارى زەرتتەۋ جۇمىستارىن جۇرگىزىپ، مۇمكىن بولعان ولەكسەلەردەن سىنامالار العان. سونىمەن قاتار، ماڭعىستاۋ وبلىستىق ەكولوگيا دەپارتامەنتى سۋ مەن توپىراقتان ۇلگىلەر جينادى.
الايدا ولەكسەلەردىڭ قاتتى ىدىراۋىنا بايلانىستى ۆەتەريناريالىق باقىلاۋ جانە قاداعالاۋ كوميتەتى ينفەكتسيالىق اۋرۋلاردى انىقتاۋعا ارنالعان پاتولوگيالىق ماتەريالداردان سىناما الا الماعان.
قازىر كاسپي تەڭىزى جاعالاۋى تۇراقتى باقىلاۋدا. جەرگىلىكتى اتقارۋشى ورگاندار، بالىق شارۋاشىلىعى ينسپەكتسياسى جانە وزگە دە ۇيىمداردىڭ قىزمەتكەرلەرى ولەكسەلەردى جيناپ، سانيتارلىق تالاپتارعا ساي جويعان.
مامانداردىڭ پىكىرىنشە، يتبالىقتاردىڭ قىرىلۋىنا ولاردىڭ يممۋنيتەتىنىڭ السىرەۋى جانە ءتۇرلى ينفەكتسيالىق اۋرۋلارعا بەيىمدىلىگىنىڭ ارتۋى سەبەپ بولۋى مۇمكىن.
