شىمكەنت قالاسىندا مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىندەگى ءىرى كولەمدەگى قارجى جىمقىرۋ ىسىنە قاتىستى سەگىز ادامعا سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
ءىس شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا قارالدى.
سوت مالىمەتىنشە، ايىپتالۋشىلاردىڭ جەتەۋى قازاقستان رەسپۋبليكاسى قىلمىستىق كودەكسىنىڭ 189-بابى 4-بولىگى بويىنشا – قىزمەتتىك جاعدايىن پايدالانىپ، اسا ءىرى كولەمدە مۇلىكتى يەمدەنۋ دەرەگىمەن كىنالى دەپ تانىلدى. تاعى ءبىر ادامعا وسى باپتىڭ 3-بولىگى بويىنشا ايىپ تاعىلعان.
تەرگەۋ بارىسىندا ۋنيۆەرسيتەتتىڭ بۇرىنعى ءبىرىنشى پرورەكتورىنىڭ سالعىرتتىعى سالدارىنان وقۋ ورنىنا 153,5 ملن تەڭگە كولەمىندە شىعىن كەلگەنى انىقتالعان. سونىمەن قاتار، قارجى دەپارتامەنتىنىڭ ديرەكتورى 166,7 ملن تەڭگەنى، مىندەتىن اتقارۋشى ديرەكتور 100,1 ملن تەڭگەنى جىمقىرعان. ال اكىمشىلىك-شارۋاشىلىق دەپارتامەنتىنىڭ ديرەكتورى وزگە تۇلعالارمەن بىرگە 320,5 ملن تەڭگەنى يەمدەنگەن. باسقا فيگۋرانتتار دا 7,3 ملن-نان 61,6 ملن تەڭگەگە دەيىنگى قاراجاتتى جىمقىرۋعا قاتىسى بار دەپ تانىلدى.
سوت ايىپتالۋشىلاردىڭ كىناسى ولاردىڭ ءوز جاۋاپتارى، كۋاگەرلەردىڭ ايعاقتارى جانە ءىس ماتەريالدارى ارقىلى تولىق دالەلدەنگەنىن اتاپ ءوتتى.
ناتيجەسىندە، سوت ۇكىمىمەن:
– ءبىر ادام 8 جىلعا باس بوستاندىعىنان ايىرىلىپ، جازا 3 جىلعا شەگەرىلدى;
– بىرەۋى 7 جىلعا سوتتالدى;
– ەكەۋىنە 8 جىل مەرزىم بەلگىلەندى;
– ءبىر ادام امنيستيانى ەسكەرە وتىرىپ 5 جىل 7 ايعا سوتتالدى;
– تاعى بىرەۋىنە 5 جىل 7 اي جازا تاعايىندالدى;
– ەكى ادام شارتتى جازا الدى;
– ءبىر ادامعا امنيستيا نەگىزىندە 2 جىلعا بوستاندىعىن شەكتەۋ جازاسى كەسىلدى.
سونداي-اق، ءبىر ايىپتالۋشى امنيستيا اكتىسى بويىنشا نەگىزگى جازادان بوساتىلدى.
