ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە پروفەسسور مارات بارمانقۇلوۆ اتىنداعى «تەلەزەرتحانا» ۇيىرمەسىنىڭ ۇيىمداستىرۋىمەن «سويلە، قازاقستان!» اتتى بولاشاق تەلەجۋرناليستەردىڭ ءداستۇرلى VIII كاسىبي-شىعارماشىلىق بايقاۋى ءوتتى.
اتالعان بايقاۋدىڭ نەگىزگى ماقساتى – ستۋدەنتتەردىڭ كاسىبي باسەكەگە قابىلەتتىلىگىن ارتتىرۋ، شىعارماشىلىق الەۋەتىن دامىتۋ جانە بولاشاق مامانداردى تەلەجۋرناليستيكانىڭ قىر-سىرىنا باۋلۋ.
بيىلعى سايىسقا 116 ستۋدەنت قاتىسىپ، ولار 10 سالالىق ارناعا ءبولىندى. قاتىسۋشىلار 6 نوميناتسيا بويىنشا ءوزارا باق سىناپ، ءتۇرلى فورماتتاعى تەلەجوبالاردى ۇسىندى. بايقاۋ بارىسىندا ستۋدەنتتەر وقۋ پروتسەسىندە العان تەوريالىق بىلىمدەرىن تاجىريبەمەن ۇشتاستىرىپ، شىنايى تەلەۆيزيالىق جۇمىس اتموسفەراسىن سەزىندى.
ناتيجەسىندە باس جۇلدەنى «ساياحات news» ارناسى جەڭىپ الدى. ءبىرىنشى ورىن «عالامشار» ەكولوگيالىق ارناسىنا بۇيىرسا، ەكىنشى ورىندى «ادال اس» ارناسى يەلەندى. ال ءۇشىنشى ورىندى «اقپارات KZ» ارناسى قاناعات تۇتتى.
قاتىسۋشىلاردىڭ جۇمىستارىنا تاۋەلسىز ساراپشىلار رەتىندە كاسىبي ماماندار باعا بەرىپ، ولاردىڭ شەبەرلىگى مەن شىعارماشىلىق ىزدەنىستەرىن جوعارى باعالادى.
اتالعان بايقاۋ جاس تەلەجۋرناليستەردىڭ كاسىبي قالىپتاسۋىنا سەرپىن بەرىپ، ولاردىڭ مەديا سالاسىنداعى العاشقى قادامدارىن نىعايتۋعا مۇمكىندىك جاسادى.
