دوستىق ۇيىندە كونستيتۋتسيا كۇنى اتالىپ ءوتتى

213

تامىزىندىڭ 28 كۇنى تاراز قالاسىنىڭ دوستىق ۇيىندە جامبىل وبلىسى  قحا انالار مەن اقساقالدار كەڭەسىنىڭ ەتنومادەني بىرلەستىك جاستارىمەن قازاقستان رەسپۋبليكاسىنىڭ كونستيتۋتسيا كۇنىنە وراي «ەلىمنىڭ ەركىندىگى – اتا زاڭىم» اتتى كەزدەسۋى ءوتتى، دەپ حابارلايدى adyrna.kz ۇلتتىق پورتالى جامبىل وبلىسى اكىمى اپپاراتى «قوعامدىق كەلىسىم» كمم  ءباسپاسوز ورتالىعىنا سىلتەمە جاساپ.

كەزدەسۋدى جامبىل وبلىسى قازاقستان حالقى اسسامبلەياسى مەن وبلىس اكىمى اپپاراتىنىڭ «قوعامدىق كەلىسىم» كمم ۇيىمداستىردى. جيىنعا وبلىستىق قحا ەتنومادەني بىرلەستىكتەرىنىڭ وكىلدەرى، «جاڭعىرۋ جولى» جاستار قوزعالىسى، وبلىستىق جانە قالالىق باق تىلشىلەرى قاتىستى. جامبىل وبلىسى اكىمى اپپاراتىنىڭ «قوعامدىق كەلىسىم» كمم باسشىسى رانو ۋبايدۋللاەۆانىڭ ايتۋىنشا، ەلىمىز قۇقىقتىق مەملەكەتكە اينالعان. سونداي-اق ول اتا زاڭنىڭ ارقاسىندا ەلىمىزدەگى ءار ءتۇرلى ەتنوس وكىلدەرى تاتۋ-ءتاتتى عۇمىر كەشىپ جاتقانىن مالىمدەدى.

ودان كەيىن قحا انالار كەڭەسىنىڭ ءتورايىمى، «جامبىل وبلىسىنىڭ وزبەك ەتنومادەني بىرلەستىگى» قوعامدىق بىرلەستىگىنىڭ باسقارما مۇشەسى – مۋحاببات ميراجاپوۆا  «قازاقستان رەسپۋبليكاسىنىڭ كونستيتۋتسياسى - ەركىندىك، تەڭدىك جانە بوستاندىق مۇراتتارىن ۇستانۋ» تاقىرىبىندا ءسوز سويلەپ، كونستيتۋتسيامىزدىڭ ەرەكشە تۇستارىن اتاپ ءوتتى.  ال «احىسكا»  تۇرىك  ەتنومادەني ورتالىعى» قوعامدىق بىرلەستىگىنىڭ جامبىل وبلىستىق فيليالى» توراعاسىنىڭ ورىنباسارى يبراگيم زۋفاروۆ  اتا زاڭىمىز – كونستيتۋتسيانىڭ ءبىزدىڭ ومىرىمىزدەگى ماڭىزدىلىعى جونىندە بايانداما جاسادى.

– قازاقستان كونستيتۋتسياسىنا سايكەس  قازاقستاندىقتاردىڭ ۇلتىنا، تىلىنە، دىنىنە شەكتەۋ قويىلماي، قۇقىقتارى تەڭ دارەجەدە قارالادى. بۇدان بولەك كەز-كەلگەن قازاقستانداعى ەتنوس ءوز سالت-داستۇرلەرىن ۇستانۋعا، كوپشىلىك نازارىنا ۇسىنۋعا قۇقىلى بولىپ وتىر. ءاربىر قازاقستاندىق ازامات كونستيتۋتسيادا كورسەتىلگەن زاڭعا سايكەس ارەكەت ەتسە، قازاقستاننىڭ بولاشاعى جارقىن بولارى انىق. «احىسكا» ەتنومادەني بىرلەستىگى ەلىمىزدىڭ اتا زاڭىنا تولىق ارقا سۇيەپ، مەدەت تۇتامىز، – دەدى ول.

جيىن سوڭىندا جامبىل وبلىسى اكىمى اپپاراتىنىڭ «قوعامدىق كەلىسىم» كمم باسشىسى رانو ماحسۇدقىزى ءىس-شاراعا قاتىسقان ەتنومادەني بىرلەستىكتەردىڭ اعا بۋىنى مەن جاستارىن  كونستيتۋتسيا كۇنىمەن قۇتتىقتادى.

«ادىرنا»

ۇلتتىق پورتالى

پىكىرلەر