رەسەيدە شامامەن 12 000 سولتۇستىككورەيالىق اسكەري قىزمەتكەر بار، ونىڭ ىشىندە 500 وفيتسەر مەن ءۇش گەنەرال بار جانە وقۋ بەس اسكەري بازادا وتۋدە. بۇل تۋرالى ۋكراينا اسكەري بارلاۋى بەيسەنبى كۇنى مالىمدەبى، دەپ حابارلايدى “ادىرنا” ۇلتتىق پورتالى.
مالىمەت بويىنشا، رەسەيدە جاتتىعۋدان وتكەن سولتۇستىك كورەيانىڭ العاشقى بولىمشەلەرى كۋرسك وبلىسىندا ورنالاستىرىلعان.
سونداي-اق، رەسەي فەدەراتسياسى قورعانىس ءمينيسترىنىڭ ورىنباسارى يۋنۋس-بەك ەۆكۋروۆ سولتۇستىك كورەيا اسكەريلەرىنىڭ جاتتىعۋلارىن باقىلاۋعا جاۋاپتى بولىپ تاعايىندالدى، دەلىنگەن قۇجاتتا.
ال اقش ۇلتتىق قاۋىپسىزدىك كەڭەسى وكىلىنىڭ ايتۋىنشا، ماسكەۋ مەن پحەنياننىڭ اسكەري ىنتىماقتاستىعى زاڭسىز.
بەيسەنبى كۇنى اق ءۇي ۇلتتىق قاۋىپسىزدىك كەڭەسىنىڭ وكىلى دجون كيربي ماسكەۋ مەن پحەنياننىڭ قورعانىس سالاسىنداعى كەز كەلگەن ىنتىماقتاستىعى - بۇۇ قاۋىپسىزدىك كەڭەسىنىڭ رەسەي قول قويعان قارارلارىن بۇزۋى ەكەنىن ايتتى.
«ءبىز كەم دەگەندە بىرنەشە مىڭ سولتۇستىككورەيالىق ساربازدىڭ رەسەيدىڭ شىعىسىنداعى ءۇش اسكەري جاتتىعۋ بازاسىندا ورنالاسقانىن بىلەمىز.
ءبىز ولاردىڭ ناقتى نە ءۇشىن دايىندالىپ جاتقانىن جانە ۋكرايناعا قارسى سوعىسقا قاتىساتىن-قاتىسپايتىنىن بىلمەيمىز... بىراق بۇل بۇۇ قاۋىپسىزدىك كەڭەسىنىڭ قارارلارىن بۇزۋ. ەسكە سالا كەتەيىن، وعان رەسەيدىڭ ءوزى قول قويدى. سولتۇستىك كورەيادان قارۋ-جاراق پەن وق-ءدارى ساتىپ الۋ دا بۇۇ-نىڭ قولدانىستاعى سانكتسيالارى مەن قارارلارىن بۇزۋ بولىپ تابىلادى، وعان تاعى دا رەسەيدىڭ ءوزى قول قويدى. ءبىز مۇنى مۇقيات قاداعالايتىن بولامىز»، دەدى كيربي.
كيربي اقش سولتۇستىك كورەيا باسشىسى كيم چەن ىننىڭ كەلىسىمنەن نە كۇتەتىنىن ناقتى بىلمەيتىنىن جانە بۇل الاڭداتاتىنىن ايتتى.
دجون كيربي اقش اسكەرىنىڭ ۋكرايناداعى اسكەري وپەراتسيالارعا تىكەلەي قاتىسى جوق ەكەنىن ەسكە سالدى. ول مايك تەرنەر بۇل تۋرالى ايتقانىن جانە پرەزيدەنت دجو بايدەننىڭ ءوزى «بۇل ۇستانىمدى انىق بىلدىرەتىنىن” ايتا كەتتى.
ال رەسەي پرەزيدەنتى ۆلاديمير پۋتين قازانداعى بريكس ءسامميتىنىڭ قورىتىندى ءباسپاسوز ءماسليحاتىندا العاش رەت بۇل اقپاراتقا تۇسىنىكتەمە بەردى. ول ولاردىڭ رەسەيدە بولۋىن جوققا شىعارمادى، دەگەنمەن ولاردىڭ قانداي ماقساتپەن كەلگەنىن ناقتىلامادى.
امەريكالىق NBC تەلەكومپانياسىنىڭ ءجۋرناليسى پۋتينگە “سپۋتنيكتەن تۇسىرىلگەن سۋرەتتەر كحدر اسكەريلەرىنىڭ بارىن كورسەتەدى. ولار مۇندا نە ىستەپ ءجۇر؟” دەپ سۇرادى . «ال بۇل قاقتىعىستىڭ ايتارلىقتاي ءورشۋى ەمەس پە؟»
«رەسەيدىڭ ارەكەتى شيەلەنىسكە سەبەپ بولعان جوق»، - دەپ جاۋاپ بەردى پۋتين.
سونداي-اق، ول سونداي-اق باتىس ەلدەرىن ۋكراينا ارمياسىن قارۋلاندىرىپ، سوعىسۋعا كومەكتەستى دەپ تە ايىپتادى.
پۋتين بەيسەنبى كۇنى مەملەكەتتىك دۋمانىڭ وسى جازدا پحەنياندا رەسەي پرەزيدەنتى قول قويعان سولتۇستىك كورەيامەن «جان-جاقتى ستراتەگيالىق سەرىكتەستىك» تۋرالى كەلىسىمدى راتيفيكاتسيالاعانىن ەسكە سالدى. شارت ونىڭ قاتىسۋشىلارىنىڭ بىرىنە قارسى «باسقىنشىلىق جاعدايىندا ءوزارا كومەك كورسەتۋدى» بىلدىرەدى.
