رەسپۋبليكا كۇنى قارساڭىندا مەملەكەتتىك باعدارلاما اياسىندا 304 وتباسى قونىس تويىن تويلادى. سالتاناتتى كىلت تاپسىرۋ راسىمىنە قالا اكىمى عابيت سىزدىقبەكوۆ قاتىسىپ، قۋانىش يەلەرىن قۇتتىقتادى.
ۇلىق مەرەكە قارساڭىندا پايدالانۋعا بەرىلگەن بوزارىق شاعىن اۋدانىندا ورنالاسقان باسپانالاردى تۇرعىن ءۇي كەزەگىندەگى ازاماتتار وتباسى بانك ارقىلى «2-10-20»، «5-10-20» باعىتتارى بويىنشا نەسيەلىك نەگىزدە راسىمدەگەن. جاڭا قونىستانۋشىلار اراسىندا ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار، تولىق ەمەس جانە كوپبالالى وتباسىلار، مۇمكىندىگى شەكتەۋلى ازاماتتار، جەتىم جانە اتا-اناسىنىڭ قامقورلىعىنسىز قالعان بالالار، بيۋدجەتتىك ۇيىمداردىڭ قىزمەتكەرلەرى بار.
بۇگىندە 304 پاتەرلىك 8 كوپقاباتتى تۇرعىن ۇيگە كونكۋرس جۇرگىزىلدى. قازىرگى تاڭدا ازاماتتارمەن ساتىپ الۋ ساتۋ كەلىسىم شارتى جاسالۋدا. بۇدان بولەك، مەملەكەتتىك باعدارلاما اياسىندا «وتباسى بانك» اق ارقىلى 400 پاتەرلىك 10 كوپقاباتتى تۇرعىن ۇيگە كونكۋرس وتكىزىلۋدە.
بۇگىندە مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان مەملەكەتتىك باعدارلامالار حالقىمىزدىڭ جايلى ءومىر سۇرۋىنە تىكەلەي باعىتتالۋدا. كرەديتتىك تۇرعىن ۇيلەردىڭ قولجەتىمدىلىگىن ارتتىرۋ جانە تابىسى از ازاماتتاردى ىنتالاندىرۋ ماقساتىندا جەرگىلىكتى بيۋدجەت ەسەبىنەن 311 وتباسى قايتارىمسىز نەگىزدەگى الەۋمەتتىك كومەك رەتىندە تۇرعىن ءۇي سەرتيفيكاتى ارقىلى نەسيەلىك باسپاناعا قول جەتكىزگەن بولاتىن. جىل سوڭىنا دەيىن تاعى 4 مىڭنان استام پاتەر بەرۋ جوسپارلانۋدا.
