قىزىلوردادا 15 جاستاعى ۇلىنان ايىرىلعان اكە سوت وتىرىسىنا قاتىستى شاعىمىن ايتتى، دەپ حابارلايدى "ادىرنا" ۇلتتىق پورتالى.
Stan.kz مالىمەتىنشە، 43 جاستاعى مەدەۋ ارىستانبەك ەسىمدى ازامات ۇلى ابدۋل-ازيز وزىنەن 9 جاس ۇلكەن جىگىتتەردىڭ الىمجەتتىگىنەن كوز جۇمعان ايتقان بولاتىن. ءۇش بالا تاربيەلەپ وتىرعان جالعىزباستى اكە قازىر سوت پروتسەسى مۇلدە اقىلعا سىيمايتىن فورماتتا ءوتىپ جاتقانىنا شاعىمدانۋدا.
ونىڭ سوزىنشە، ءبىرىنشى سوت وتىرىسىن ەش حابارلاماستان جابىرلەنۋشى تاراپتىڭ قاتىسۋىنسىز وتكىزىپ جىبەرگەن. ال ءۇشىنشى سوت وتىرىسى ۋاقىتىندا باستالماعان. سەبەبى سول كەزدە پروكۋرور مەن ايىپتالۋشىنىڭ ادۆوكاتى ءبىر كابينەتتە اقىلداسىپ وتىرعان.
“2021 جىلى جۇبايىم ءۇش بالامدى تاستاپ اجىراسىپ كەتتى. ەكى قىزىم مەن جالعىز ۇلىم وسى ەدى. ءوزى سپورتشى بولدى. 90 كەلى سالماقتا وبلىستىق قول كۇرەسىنەن 1-2-ورىندى ەشكىمگە بەرمەي كەلە جاتقان. 15 جاستا ءالى سۇيەگى قاتپاعان بالا ەدى”، – دەدى مەدەۋ ارىستانبەك.
كوز جۇمعان وقۋشى ابدۋل-ازيزدىڭ ءىسى جاڭاقورعان اۋداندىق سوتىندا قارالىپ جاتىر.
“تەرگەۋ ءىسى تولىق اياقتالماعان. سولاي سوتقا وتكىزىپ جىبەرىپ وتىر. ونى بىزگە دە ەسكەرتپەگەن. تەرگەۋدىڭ سوتقا جەتكەنىن كەيىن عانا ءبىلدىم. ءبىرىنشى سوت وتىرىسى بولايىن دەپ جاتىر دەگەن حابارلاما دا، شاقىرتۋ دا كەلمەدى. جابىرلەنۋشىلەر تاراپىنان بۇل وتىرىسقا قاتىسپادىق تا. ايىپتالۋ اكتىسىن زاڭ بويىنشا تەرگەۋشى ماعان الدىن الا بەرۋى كەرەك ەكەن. ال ولار بولسا اكتىنى ماعان 20 كۇننەن كەيىن ەكىنشى سوت وتىرىسى كەزىندە بەرىپ تۇر. وندا دا سوت ۇستىندە بەردى. كەشەگى ءۇشىنشى سوت وتىرىسى 15:30-دا باستالۋى كەرەك بولعان. الايدا باستالماي كۇتىپ قالدىق. بولماعان سوڭ ساعات تورتتەردە مەنىڭ ادۆوكاتىم “بۇل نە دەگەن باسسىزدىق” دەپ سوت زالىنان شىققان كەزدە وزگە كابينەتتەن پروكۋرور مەن ايىپتالۋشىنىڭ ادۆوكاتى ءبىر جەردە وتىرعانىن كوردى. سوت كەشىگىپ، باستالماي جاتتى. ال ولار بولسا ءبىر بولمەدە نەنى اقىلداسىپ وتىرعاندارى بەلگىسىز. كۇدىك كوپ، ادىلەتسىز بولعالى تۇر، – دەدى مارقۇمنىڭ اكەسى.
مەدەۋ ارىستانبەك سول ىسكە قاتىسى بار ءۇش ۇلدىڭ بىرەۋى عانا كىنانى موينىنا الىپ وتىرعانىن جەتكىزدى. ال قالعان ەكەۋى كۇدىكتى بولۋدىڭ ورنىنا كۋاگەرگە اينالىپ كەتكەن ەكەن.
جابىرلەنۋشى تاراپ باستى كۇدىكتى بولىپ، قاماۋدا 24 جاستاعى جىگىت وتىرعانىن حابارلادى. ال توبەلەستىڭ باستى سەبەبى الىمجەتتىك ەكەن. مەدەۋ ارىستانبەك اۋىلدا ۇلكەن جىگىتتەردىڭ كىشكەنتايلاردان اقشا جينايتىنىن دا جاسىرمادى.
