كولىك مينيسترلىگى اۆياتسيا كوميتەتى توراعاسى تالعات لاستاەۆ وقۋ-جاتتىعۋ كەزىندە قاراعاندى وبلىسىندا بولعان ۇشاق اپاتىنا قاتىستى تۇسىنىكتەمە بەردى، دەپ حابارلايدى «ادىرنا» ۇلتتىق پورتالى.
ۇكىمەت وتىرىسىنان كەيىن تالعات لاستاەۆ جۋرناليستەردىڭ قويعان ساۋالدارىنا جاۋاپ بەردى. كوميتەت توراعاسى قازىرگى ۋاقىتتا تەرگەۋ ءجۇرىپ جاتقانىن مالىمدەدى.
«اپاتتان كەيىن تەرگەۋ امالدارى بىردەن باستالدى. وقيعا ورنىنا ماماندار باردى. اۋەدەگى ۇشاق اپاتى بويىنشا نەگىزى ءۇش نۇسقا قاراستىرىلادى. ول ادامي فاكتور، تەحنيكانىڭ ىستەن شىعۋى، جانە سىرتقى اسەرلەر»، - دەدى مينيستر.
سونىمەن قاتار اۆياتسيا كوميتەتىنىڭ باسشىسى، نۇسقاۋشىنىڭ تاجىريبەلى بولعانىن ايتتى. تەرگەۋ قورىتىندىسى بويىنشا ناتيجەلەر قوسىمشا حابارلاناتىنىن جەتكىزدى.
«نۇسقاۋشى ۇشقىش تاجىريبەلى، ول اۋەدە 1097 ساعات ۇشقان. العاشقى دايىندىقتى جۋكوۆسكي اتىنداعى اسكەري-اۋە اكادەمياسىنىڭ اسكەري-اۋە كۇشتەرىنىڭ جوعارى وقۋ ورتالىعىندا وتكىزدى. وعان كۋالىك 2019 جىلى بەرىلدى. اۋە قورعانىسى كۇشتەرى اسكەري ينستيتۋتىنىڭ كۋرسانتى، اسكەري دارەجەسى – قاتارداعى جاۋىنگەر»، - دەيدى ول.
ەسكە سالايىق، 30 قىركۇيەك كۇنى قاراعاندى وبلىسىندا وقۋ-جاتتىعۋ ۇشۋى كەزىندە P2002 ءتيپتى UPLA286 ۇشاعى اپاتقا ۇشىراپ، ەكى ادام قازا تاپقانى تۋرالى جازعان ەدىك.
«ادىرنا» ۇلتتىق پورتالى
