باس اسكەري پروكۋروردىڭ ءبىرىنشى ورىنباسارى ماقسات قازيەۆ اسكەردە مۇگەدەك بولىپ قالعان مەرزىمدى اسكەري قىزمەتشى ەربايان مۇحتاردىڭ ىسىنە قاتىستى پىكىر ءبىلدىردى. بۇل تۋرالى ول 25 اقپاندا ورتالىق كوممۋنيكاتسيالار قىزمەتىندە وتكەن بريفينگتە ايتتى، دەپ حابارلايدى “ادىرنا” ۇلتتىق پورتالى.
ول اسكەري قىزمەتشى مۇحتار ەرباياننىڭ العان اۋىر جاراقاتىنا بايلانىستى بىرقاتار جەدەل-تەرگەۋ شارالارى جۇرگىزىلىپ جاتقانىن، ساراپتامالار تاعايىندالعانىن اتاپ ءوتتى. بارلىق دالەلدەر جينالعاننان كەيىن شەشىم قابىلدانادى. ءىس باس پروكۋرور مەن باس اسكەري پروكۋروردىڭ ەرەكشە باقىلاۋىندا.
"قازىرگى ۋاقىتتا بۇل ءىس بويىنشا ناقتى كۇدىكتىلەر جوق. بەلگىلى ءبىر توپ بار، ولار تەرگەۋدە", – دەدى ماقسات قازيەۆ.
ىشكى ىستەر مينيسترلىگى ۇلتتىق ۇلاننىڭ تاربيە جانە الەۋمەتتىك-قۇقىقتىق جۇمىسى باس باسقارماسىنىڭ باستىعى نۇرباي بەكتۇرسىنوۆ ەربايان مۇحتاردىڭ تۇركيادا ەمدەلگەنىن ەسكە سالدى. ەندى ول ەمدەۋدىڭ ەكىنشى كەزەڭىنەن وتەدى. وعان ۇلتتىق ۇلان ساربازدارى مەن باسقا دا مەملەكەتتىك ورگاندار كومەك كورسەتتى.
ء"بىز اتا-انالارمەن بايلانىستامىز جانە قولدان كەلگەن كومەگىمىزدى كورسەتەمىز. قىزمەتتىك تەكسەرۋ جۇرگىزىلدى. ەربايان مۇحتارعا قاتىستى زاڭ بۇزۋشىلىق نەمەسە قىسىم كورسەتۋ فاكتىلەرى بولماعانى انىقتالدى", – دەدى ول.
قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باسشىسى تىلەۋحان باسقوجاەۆ ەربايان مۇحتاردىڭ قورعانىس مينيسترلىگىنىڭ اسكەري ۇشاعى تۇركياعا ەمدەلۋگە جەتكىزىلگەنىن قوستى. الداعى ۋاقىتتا ءبولىم وعان قولداۋ كورسەتۋگە دايىن.
بۇعان دەيىن قورعانىس مينيسترلىگى ەربايان مۇحتاردىڭ 2023 جىلى 4 جەلتوقساندا دارەتحاناداعى پليتكاعا باسىن سوعىپ، جاراقات العانىن حابارلاعان.
