22 قازان كۇنى اقتاۋدا رەسپۋبليكا كۇنى قارساڭىندا ۇيىمداستىرىلعان ۇلتتىق كيىمدەر شەرۋىنە ماڭعىستاۋ وبلىسىنىڭ 500-گە جۋىق تۇرعىنى قاتىستى. بۇل تۋرالى ماڭعىستاۋ وبلىسىنىڭ قوعامدىق كوممۋنيكاتسيالار ورتالىعى مالىمدەدى، دەپ حابارلايدى “ادىرنا” ۇلتتىق پورتالى.
ۇلتتىق كيىمنىڭ اسەمدىگى مەن دارالىعىن كورسەتۋگە بەل بۋعانداردىڭ قاتارىندا ديزاينەرلەر، تىگىنشىلەر، ءسان ۇيلەرى، سونداي-اق قالاداعى ءىرى مەكەمەلەر مەن ءبىلىم بەرۋ ۇيىمدارىنىڭ وكىلدەرى، وبلىس ورتالىعىنىڭ تۇرعىندارى بار. شەرۋدىڭ باستى ماقساتى – قازاقتىڭ ۇلتتىق كيىم ۇلگىلەرىن قوعامدا كەڭىنەن ناسيحاتتاپ، زامان تالابىنا ساي جاڭعىرتىپ، ءسان الەمىنە ەنگىزۋ.
شارا ەرەكشە فورماتتا باستالدى. بۇركىتتىڭ قاۋىرسىنىمەن بەزەندىرىلگەن ۇلتتىق باس كيىم كيگەن قىز-كەلىنشەكتەر مەن انالار قازاقتىڭ ۇلتتىق كيىمدەرىمەن قوعامدىق كولىكتەرگە ءمىنىپ، حالىق اندەرىن شىرقاپ، جولاۋشىلارعا تاماشا كوڭىل-كۇي سىيلادى.
شەرۋدىڭ نەگىزگى بولىگى تەڭىز جاعالاۋىندا جالعاستى. ءداستۇرلى شاپان مەن تاقيا كيگەن قاريالار ۇلتتىق مادەنيەتتىڭ كورنەكتى بەينەسىن پاش ەتسە، مەكتەپ وقۋشىلارى ۇلتتىق ناقىشتاعى كيىمدەرىمەن شەرۋگە ەرەكشە ءسان بەردى. سونىمەن قاتار، اجە باس كيىمدەرى – كيمەشەك پەن مەرەكەلىك كيىمدەردەن باستاپ، قالىڭدىق كيەتىن ساۋكەلەگە دەيىن ۇلتتىق كيىمدەردىڭ وزىندىك جانە زاماناۋي ۇلگىلەرى كوپشىلىك نازارىنا ۇسىنىلدى.
شارا اياسىندا اسىق اتۋ، توعىزقۇمالاق، ارقان تارتۋ، قازاقشا كۇرەس سياقتى ءداستۇرلى ۇلتتىق ويىندار ۇيىمداستىرىلىپ، جەڭىمپازدار ارنايى ماراپاتتارعا يە بولدى.
ايتا كەتەرلىگى، ۇلتتىق كيىمدەر شەرۋىن ىشكى ساياسات جانە تىلدەردى دامىتۋ ءبولىمىنىڭ مەملەكەتتىك الەۋمەتتىك تاپسىرىسى اياسىندا «ماڭعىستاۋ» جەرگىلىكتى باستامالاردى قولداۋ ورتالىعى» قوعامدىق قورى ۇيىمداستىردى.
