مەملەكەتتىك سىيلىقتىڭ قاۋلىسى ءالى شىققان جوق. بىراق بايگەدەن ماڭدايى جارقىراپ وزىپ شىققاندار اراسىندا قۇلبەك ەرگوبەك پەن سۆەتقالي نۇرجان بار دەگەندى ەستىگەنگە ءوز باسىم قاتتى قۋانىپ وتىرمىن.
ەكەۋى دە ەڭبەكتەرى سىڭگەن ەرلەر، وعان ەشكىمنىڭ داۋى بولا قويماس دەگەن ۇمىتتەمىن.
ال "پروزادان لاۋرەات بولمايدى ەكەن" دەلىنگەلى دەگبىرىم قاشتى. مەنىڭشە،.وسى جولى ۇسىنىلىپ وتىرعانداردىڭ ءبارى دە لايىقتى. قازاق ادەبيەتى پروزادا بۇرىن-سوڭدى ءدال قازىرگىدەي بۋىرقانىستى دۇركىرەۋدى باستان كەشىپ كورگەن جوق. ەگەر بيىل ەشكىمگە بەرىلمەسە، بۇدان وتكەن قيانات پەن قىساستىق بولمايدى. ءمادي ايىمبەت، قۋانىش جيەنباي، قۋاندىق تۇمەنباي، اسقار التاي، ادىلبەك ىبىرايىمۇلى، دۋمان رامازان... مەنىڭ ەستىگەنىم وسىلار. اتالعانداردىڭ قاي-قايسىسى دا لايىق.
سوڭعى جىلدارى جازىپ جۇرگەن ءوز كىتابىما بايلانىستى ابىلقايىر حان مەن بوپاي حانىمدى ءبىراز زەرتتەدىم. سوعان وراي حانىمنىڭ قازاق تاريحىندا الاتىن زور ءرولى بارىنا كوز جەتكىزدىم. ولاي بولسا، بوپاي تۋرالى جازىلعان روماننىڭ دا قۇندى ەكەنى انىق. بۇلاردىڭ ءبارى قازاق ادەبيەتىندە ءوز ورىندارى مەن ورنەكتەرى بار قالامگەرلەر. سونىڭ ىشىندە "سەمسەر جۇزىندەگى سەرت" سەكىلدى تريلوگيا دا جىل تۇرماق، ون-جيىرما جىلدا دا جازىلا بەرمەيدى. بىزدە ەپيك جازۋشىلار دا كوپ بولعان جوق. ساۋساقپەن ساناۋلىق قانا. قايسى ءبىر جىلى سايلاۋباي جۇباتىرۇلى دا "ابىرجى" دەگەن ەپيكاسىمەن قۇلاتىپ جىبەرىلدى. مۇنىڭ ءبارى ادەبيەتتى باعالاماۋ بولىپ تابىلادى.
قالاي دەگەندە دە، ادەبيەتتىڭ تىرەگى - پروزا. بۇل سالادان قولدىڭ سالاسىنداي بولىپ ءۇزىلىپ شىعىپ تۇرعان تۋىندىلاردىڭ ءبارى مەملەكەتتىك سىيلىق سۇلبەسىنىڭ كۇرەسىنىنە لاقتىرىلا سالىنسا، جالپى ادەبيەت تۋرالى ءسوز قوزعاپ، وي سوراپتاپ جاتۋدىڭ ءوزى ارتىق.
دەگەنمەن، بۇلاردىڭ ءوزى قۇلبەك پەن سۆەتقالي ءۇشىن قۋانىشتىڭ قاۋىزىن باسا المايدى.
ءوز پايىمىم.
Serik Pirnazar
