پرەزيدەنت قاسىم-جومارت توقاەۆ جەڭىمپازداردى شىن جۇرەكتەن قۇتتىقتاپ، ولار ناعىز قازاق جاۋىنگەرى رۋحىنىڭ قانداي بولاتىنىن الەم جۇرتشىلىعىنا پاش ەتكەنىن، قازاقستاننىڭ بەدەلىن بيىككە كوتەرگەنىن اتاپ ءوتتى.
"نامىستى قولدان بەرمەي، بايراقتى باسەكەدە توپ جاردىڭىزدار! سونىڭ ارقاسىندا كوك تۋىمىز جەلبىرەدى. ەلىمىزدىڭ مەرەيى ۇستەم بولدى. حالقىمىز سىزدەردى ماقتان تۇتادى. الەمنىڭ 48 ەلىنەن 100-دەن استام كوماندا جينالعان دۋبايداعى ءدۇبىرلى دودا – حالىقارالىق ماڭىزى بار وقيعا. بۇل اسا تارتىستى جارىس دەپ ايتساق، قاتە بولمايدى. سەبەبى بارلىق كوماندالار بەس كۇن بويى وتە كۇردەلى ماقساتتارعا قول جەتكىزۋ ءۇشىن كوپتەگەن توسقاۋىلداردى ەڭسەرۋى قاجەت بولدى. بىراق ءبىزدىڭ جاۋىنگەرلەر بارىن سالدى، اسكەري مىندەتتەردى ءمىنسىز ورىنداپ، اقىرى ەڭ جوعارى دەڭگەيدەگى شەبەرلىكتەرىن كورسەتتى. مۇنداي جارىسقا ءار مەملەكەت ءوزىنىڭ ەڭ مىقتى ساربازدارىن جىبەرەدى. سوعان قاراماستان ەل ءۇمىتىن اقتاپ، ۇزدىكتەردىڭ ۇزدىگى اتانۋ وڭاي ەمەس ەكەنى انىق".مەملەكەت باسشىسى قاسىم-جومارت توقاەۆپرەزيدەنتتىڭ ايتۋىنشا، بۇل كەزدەيسوق جەتىستىك ەمەس. ءار جەتىستىك – زور ەرىك-جىگەر مەن قاجىرلى ەڭبەكتىڭ جەمىسى.
ء"ار جەڭىس – مىقتى كاسىبي دايىندىق پەن اسقان شەبەرلىكتىڭ ايقىن كورىنىسى. وزدەرىڭىز بىلەسىزدەر، بىلتىر وسى بەدەلدى جارىستا قازاقستان قۇراماسى ەكى كۇمىس جۇلدەنى ەنشىلەدى. بيىل دا سول جەڭىس جولىن جالعاستىرىپ، زور سەنىم ارتقان ۇلتتىق كوماندامىز ابىرويمەن ورالدى. "قازاقستان س" كومانداسى تەڭدەسى جوق، ياعني ءابسوليۋتتى چەمپيون اتاندى. بۇل – تاماشا جەتىستىك، بۇل جەڭىس وسى ءتۋرنيردىڭ تاريحىندا قالادى. جىلدار زىمىراپ وتەدى، بىراق سىزدەردىڭ بالالارىڭىز، وسى قۋانىشتى كۇندەردىڭ كۋاسى بولعان، سىزدەردى قولداعان، سىزدەردى ماقتان تۇتقان بارلىق ادامدار بۇل جەڭىستى ءاردايىم ەرەكشە سەزىممەن ەسكە الىپ، ايتىپ وتىرادى. ال "قازاقستان ا" كومانداسى ەكىنشى ورىنعا يە بولدى. بۇل دا وتە جاقسى، ءبارىمىزدى قۋانتقان كەرەمەت ناتيجە", – دەدى قاسىم-جومارت توقاەۆ.پرەزيدەنت "توميريس" قىزدار قۇراماسىنىڭ جەتىستىگىنە ايرىقشا توقتالدى.
"سۇلۋ قىزدارىمىز وتە جوعارى دەڭگەيدە ونەر كورسەتتى، شەبەرلىكپەن العا شىعىپ، ايەلدەر اراسىندا توپ جاردى. قازاقستاننىڭ نامىسىن قورعاعان بەس قۇرامانىڭ ءبارى دە ۇزدىك 20 كوماندانىڭ تىزىمىنە كىردى. بۇل ناعىز جاسامپاز وتانشىلدىق دەپ كۇمانسىز ايتۋعا بولادى. تورتكۇل دۇنيە ۇل-قىزدارىمىزدىڭ مىقتىلىعىنا كۋا بولدى. سوندىقتان تاعى دا اتاپ وتكىم كەلەدى، سىزدەر كورسەتكەن مىقتى تاكتيكالىق دايىندىق، ايرىقشا كۇش-جىگەر مەن تاماشا توپتىق جۇمىستىڭ ارقاسىندا الەم جۇرتشىلىعى قازاقتىڭ باتىل، قايسار جانە ءور رۋحتى ۇلت ەكەنىنە كوز جەتكىزدى. بارشاڭىزعا شىنايى ريزاشىلىعىمدى بىلدىرەمىن. بارلىق باپكەر مەن جاتتىقتىرۋشىعا جانە اسكەري باسشىلارعا، باسقا دا ماماندارعا زور العىس ايتامىن", – دەدى پرەزيدەنت.
فوتو: اقوردا
"بۇل – ەل تاعدىرىنا تىكەلەي اسەر ەتەتىن اسا ماڭىزدى شەشىم بولماق. باستى قۇجاتتىڭ جوباسىندا ەگەمەندىگىمىزدى جانە مەملەكەتتىگىمىزدى نىعايتاتىن مىزعىماس رۋحاني جانە قۇقىقتىق قۇندىلىقتار بەكىتىلدى. قازاقستان رەسپۋبليكاسىنىڭ اۋماقتىق، ياعني جەرىنىڭ تۇتاستىعى، ەگەمەندىگى، تاۋەلسىزدىگى، ادام مەن ونىڭ ءومىرى، بارلىق ازاماتتاردىڭ قۇقىقتارى جانە بوستاندىقتارى ەڭ جوعارى قۇندىلىقتار رەتىندە جاريالاندى. جاۋاپتى ءارى جاسامپاز وتانشىلدىق ۇعىمى ايقىندالدى. ادىلەتتى قازاقستان يدەياسى، زاڭ جانە ءتارتىپ قاعيداتى جاڭا كونستيتۋتسيا جوباسىندا لايىقتى ورنىن تاپتى. مۇنىڭ ءبارىن ءىس جۇزىندە ورنىقتىرۋ – بارشاعا ورتاق پەرزەنتتىك پارىز. تۇپتەپ كەلگەندە، جاڭا اتا زاڭىمىز ەلىمىزدىڭ ودان ءارى دامۋىنا جانە وركەن جايۋىنا جول اشۋى كەرەك. ال كۇشتىك قۇرىلىمدار مەن ارنايى جاساقتار ەل تاۋەلسىزدىگى جانە حالىق تۇتاستىعىنىڭ تىرەگى بولۋعا ءتيىس. سەبەبى الدىمىزدا تۇرعان ماقسات– بىرەۋ. بۇل – كەلەر ۇرپاققا قۋاتتى ءارى وزىق مەملەكەتتى امانات ەتۋ. ءبارىمىز ءبىر ەل بولىپ وسى تاريحي ميسسيانى مىندەتتى تۇردە ىسكە اسىرامىز. ەل قورعاۋ – ەڭ ابىرويلى مىندەت. ناعىز وتانشىل، ادال ازاماتتار عانا وسى جولدى تاڭدايدى. سىزدەر كەلەشەكتە دە ۇلت مۇددەسىنە ءمىنسىز قىزمەت ەتە بەرەسىزدەر دەپ سەنەمىن", – دەدى مەملەكەت باسشىسى.
مەملەكەت باسشىسىنىڭ جارلىعىمەن UAE SWAT Challenge-2026 حالىقارالىق جارىسىنان جەڭىسپەن ورالعان ءبىر توپ وفيتسەر مەن اسكەري قىزمەتكەر باۋىرجان مومىشۇلى اتىنداعى ءىى دارەجەلى "ايبىن" وردەنىمەن، "جاۋىنگەرلىك ەرلىگى ءۇشىن" مەدالىمەن جانە قازاقستان رەسپۋبليكاسى پرەزيدەنتىنىڭ العىسىمەن ماراپاتتالدى.
