قازاقستان پرەزيدەنتى قاسىم-جومارت توقاەۆ ۆاشينگتوندا وتكەن بەيبىتشىلىك كەڭەسىنىڭ العاشقى وتىرىسىنا قاتىسىپ، جاڭا سىيلىق قۇرۋ تۋرالى باستاماسىن جاريالادى، دەپ حابارلايدى "ادىرنا".
جيىن ۆاشينگتونداعى اقش بەيبىتشىلىك ينستيتۋتى بازاسىندا ءوتتى. ينستيتۋتقا بىلتىر جەلتوقساندا دونالد ترامپتىڭ ەسىمى بەرىلگەن.
ءوز سوزىندە ترامپ قازاقستاندى «كەرەمەت ءارى باي مەملەكەت» دەپ اتاپ، توقاەۆقا ريزاشىلىعىن جەتكىزدى. سونىمەن قاتار ول كەڭەسكە قاتىسۋشى ەلدەر گازا سەكتورىنا گۋمانيتارلىق كومەك رەتىندە 7 ميلليارد دوللار بولۋگە ۋادە بەرگەنىن مالىمدەدى.
وتىرىستا گازا ايماعىنداعى حالىقارالىق تۇراقتاندىرۋ كۇشتەرىنە اسكەري قىزمەتكەرلەر جىبەرۋگە دايىن بەس مەملەكەت بارى ايتىلدى. ولاردىڭ قاتارىندا يندونەزيا, ماروككو, قازاقستان، كوسوۆو جانە البانيا بار.
جيىن بارىسىندا قاسىم-جومارت توقاەۆ دونالد ترامپ اتىنداعى ارنايى سىيلىق تاعايىنداۋدى ۇسىندى. ونىڭ ايتۋىنشا، بۇل ماراپات بەيبىتشىلىكتى نىعايتۋ جولىنداعى ايرىقشا جەتىستىكتەردى مويىنداۋعا باعىتتالماق.
«مەن بەيبىتشىلىك كەڭەسى اياسىندا اقش پرەزيدەنتى دونالد ترامپ اتىنداعى ارنايى ماراپات قۇرۋدى ۇسىنعىم كەلەدى. بۇل سىيلىق ونىڭ بەيبىتشىلىك جولىنداعى ەرەكشە ەڭبەگىن اتاپ وتۋگە ارنالسىن. قۇرمەتتى پرەزيدەنت مىرزا، مەن سەنىمدىمىن، ءسىزدىڭ مىقتى جەتەكشىلىگىڭىزبەن بەيبىتشىلىك كەڭەسى ءوزىنىڭ ۇلى ءارى ابىرويلى ميسسياسىن ءساتتى اتقارادى»، – دەدى توقاەۆ.
كەڭەس جۇمىسىنا 26 مۇشە مەملەكەت پەن 23 باقىلاۋشى ەل قاتىسۋدا. قاتىسۋشىلار قاتارىندا يلحام اليەۆ, شاۆكات ميرزيوەۆ, ارمەنيا پرەمەر-ءمينيسترى نيكول پاشينيان جانە البانيا پرەمەر-ءمينيسترى ەدي راما بار.
سونداي-اق ترامپ نورۆەگيا بەيبىتشىلىك كەڭەسىنىڭ بىرقاتار ءىس-شاراسىن قابىلداۋعا كەلىسكەنىن مالىمدەدى.
