قازاقستان ازاماتى ەمەس سپورتشىلارعا مەملەكەتتىك بيۋدجەتتەن ءبىر تەڭگە دە بولىنبەيدى. بۇعان قوسا كۆازيمەملەكەتتىك سەكتوردان دا شەتەلدىك اتلەتتەردى قارجىلاندىرۋ تولىقتاي توقتاتىلادى، دەپ حابارلايدى «ادىرنا» ۇلتتىق پورتالى.
ەندى زاڭعا سايكەس باسقا ەلدەن كەلگەن سپورتشىلاردىڭ جالاقىسى دا، بونۋستارى دا، ءتىپتى ترانسفەر تولەمدەرى دە قازىنادان قارجىلاندىرىلماۋعا ءتيىس. بۇل جونىندە ءماجىلىس دەپۋتاتى نارتاي سارسەنعاليەۆ مالىمدەدى.
«لەگيونەرلەرگە 1 تيىن بەرمەيتىن زاڭدىق نورمامدى ۇكىمەت قولدادى. ادام ەستىمەگەن سپورت تۇرلەرىنە اقشا بەرىپ كەلگەن مينيسترلىكتىڭ شەشىمى دە توقتاتىلدى. 180 سپورت ءتۇرى قىسقارتىلادى! ءتيىستى نورمامدى ۇكىمەت قولدادى» - دەپ جازدى نارتاي ارالبايۇلى الەۋمەتتىك جەلى پاراقشاسىندا.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ 49 بابى:
ءبىرىنشى بولىگى: «قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى بيۋدجەت قاراجاتى ەسەبىنەن قارجىلاندىرۋدى جۇزەگە اسىرۋعا تىيىم سالىنادى»;
ەكىنشى بولىگى: «قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا جول بەرىلمەيدى» - دەپ جازىلدى.
49-باپ. دەنە شىنىقتىرۋ مەن سپورتتى قارجىلاندىرۋ كوزدەرىنىڭ 6 - تارماعى مىناداي مازمۇندا جازىلادى:
«بيۋدجەت قاراجاتى ەسەبىنەن قارجىلاندىرۋ مىناداي باعىتتار بويىنشا جۇزەگە اسىرىلادى:
1) جوعارى جەتىستىكتەر سپورتى، ونىڭ ىشىندە سپورتتىڭ باسىم تۇرلەرى;
2) مەملەكەتتىك سپورت ۇيىمدارىنىڭ جۇمىس ىستەۋى;
3) بۇقارالىق سپورت;
4) سپورتتىق ينفراقۇرىلىمدى دامىتۋ».
