Qazaqstan azamaty emes sportshylarǵa memlekettik bıýdjetten bir teńge de bólinbeıdi. Buǵan qosa kvazımemlekettik sektordan da sheteldik atletterdi qarjylandyrý tolyqtaı toqtatylady, dep habarlaıdy «Adyrna» ulttyq portaly.
Endi zańǵa sáıkes basqa elden kelgen sportshylardyń jalaqysy da, bonýstary da, tipti transfer tólemderi de qazynadan qarjylandyrylmaýǵa tıis. Bul jóninde Májilis depýtaty Nartaı Sársenǵalıev málimdedi.
«Legıonerlerge 1 tıyn bermeıtin Zańdyq normamdy Úkimet qoldady. Adam estimegen sport túrlerine aqsha berip kelgen mınıstrliktiń sheshimi de toqtatyldy. 180 sport túri qysqartylady! Tıisti normamdy Úkimet qoldady» - dep jazdy Nartaı Aralbaıuly áleýmettik jeli paraqshasynda.
«Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» Zańynyń 49 baby:
Birinshi bóligi: «Qazaqstan Respýblıkasynyń azamattary bolyp tabylmaıtyn sportshylardy bıýdjet qarajaty esebinen qarjylandyrýdy júzege asyrýǵa tyıym salynady»;
Ekinshi bóligi: «Qazaqstan Respýblıkasynyń azamattary bolyp tabylmaıtyn sportshylardy kvazımemlekettik sektor sýbektileriniń qarajaty esebinen qarjylandyrýǵa jol berilmeıdi» - dep jazyldy.
49-bap. Dene shynyqtyrý men sportty qarjylandyrý kózderiniń 6 - tarmaǵy mynadaı mazmunda jazylady:
«Bıýdjet qarajaty esebinen qarjylandyrý mynadaı baǵyttar boıynsha júzege asyrylady:
1) joǵary jetistikter sporty, onyń ishinde sporttyń basym túrleri;
2) memlekettik sport uıymdarynyń jumys isteýi;
3) buqaralyq sport;
4) sporttyq ınfraqurylymdy damytý».
