فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆكە قازاق ءتىلىن «مىسقىلداعانى» ءۇشىن ايىپپۇل سالىندى. بۇل تۋرالى پارلامەنتتە قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ ايتتى، دەپ حابارلايدى “ادىرنا” ۇلتتىق پورتالى.
«باس باپكەر جۋرناليستپەن ازىلدەستى. مەن وعان ءبارىن ءتۇسىندىردىم. ەندى مۇنداي قاتەلىك جاسامايدى. سوندىقتان ول ءۇشىن بۇكىل ەل الدىندا جاۋاپتىمىن. چەرچەسوۆكە ىشكى تەكسەرۋدەن كەيىن ايىپپۇل سالىندى. ەتيكالىق جۇمىستار جالعاسىن تابادى»، - دەدى بارمەنقۇلوۆ.
بۇعان دەيىن تۋريزم جانە سپورت مينيسترلىگىنىڭ باسشىلىعى ينتەرنەتتە تاراعان ۆيدەوعا قاتىستى فەدەراتسيادان رەسمي تۇسىنىكتەمە بەرۋدى تالاپ ەتكەن بولاتىن. ۆيدەودا چەرچەسوۆ قازاق ءتىلىن قورلايتىن مالىمدەمەلەر جاساعان. جاتتىقتىرۋشىعا مەملەكەتتىك ءتىلدى قۇرمەتتەۋ قاجەتتىلىگىنە بايلانىستى تۇسىندىرمە جۇمىستارىن جۇرگىزۋ ۇسىنىلدى.
كەشەلى بەرى الەۋمەتتىك جەلىلەردە فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق ءتىلىن كەمسىتۋگە تىرىسقانى تۋرالى ۆيدەو تارادى. وسىعان قاتىستى تۋريزم جانە سپورت مينيسترلىگى بۇل جاعدايعا بەيجاي قاراماي، قازاقستان فۋتبول فەدەراتسياسىنا رەسمي حات تا جولداعان.
ايتا كەتەيىك، ۇلتتار ليگاسى اياسىندا سلوۆەنيامەن وتكەن ماچتان كەيىنگى ءباسپاسوز كونفەرەنتسياسىندا مارقۇم امانگەلدى سەيىتحاننىڭ ۇلى بەگاسىل سەيىتحان ستانيسلاۆ چەرچەسوۆكە قازاق تىلىندە سۇراق قويىپ باستايدى. باس باپكەر ءجۋرناليستىڭ ۇستىنە فرانتسيانىڭ پسج كلۋبىنىڭ جەيدەسىن كيىپ العانىن ازىلگە اينالدىرعىسى كەلدى مە، ايتەۋىر «سەن قاي تىلدە سويلەپ تۇرسىڭ – فرانتسۋزشا ما؟» دەپ ءسوزىن ءبولدى. سونان سوڭ باسىن يزەپ، سۇراعىن جالعاستىرۋعا بولاتىنىن اڭعارتتى.
