نىعماتۋليننىڭ ۇلدارىنا تيەسىلى “قازفوسفات” كومپانياسىنا 5 ملن تەڭگە ايىپپۇل سالىندى

2491
Adyrna.kz Telegram

ءماجىلىستىڭ ەكس-سپيكەرى نۇرلان نىعماتۋلليننىڭ ۇلدارى قاداعالايتىن «قازفوسفات» زاۋىتىندا ورەسكەل زاڭبۇزۋشىلىقتار انىقتالدى. بۇل تۋرالى ەكولوگيا دەپارتامەنتى مالىمدەدى, دەپ حابارلايدى “ادىرنا” ۇلتتىق پورتالى.

كاسىپورىن جۇمىسىنا جوسپاردان تىس تەكسەرۋ جۇرگىزگەن ەكولوگيا دەپارتامەنتىنىڭ ماماندارى كومپانياعا 5 ميلليون تەڭگە ايىپپۇل سالدى.

بۇعان دەيىن وبلىس ورتالىعىن بەلگىسىز ءتۇتىن باسىپ، تۇرعىنداردىڭ تىنىسىن تارىلتقانى جايلى وتاندىق باق جازعان بولاتىن. كەيىن انىقتالعانداي، «مينەرالدى تىڭايتقىشتار» زاۋىتىنداعى كۇكىرت قىشقىلىن وندىرەتىن تسەحتا اپات بولىپ، سونىڭ سالدارىنان اۋاعا كۇكىرت تريوكسيدى تاراعان. ەكولوگتار پروكۋرورلارمەن بىرلەسىپ، اۋا سىنامالارىن زەرتتەۋدەن وتكىزىپتى. اپات كەسىرىنەن زاۋىت ماڭىنداعى ى.سۇلەيمەنوۆ كوشەسى بويىنداعى سانيتارلىق قورعاۋ ايماعىندا فتورلى سۋتەگىنىڭ مولشەرى قالىپتى دەڭگەيدەن 7,5 ەسە ارتقانى انىقتالدى.

«تەكسەرۋ بارىسىندا ەكولوگيالىق زاڭنامانى بۇزۋدىڭ 5 فاكتىسى انىقتالدى. ەكولوگيالىق كودەكستىڭ تالاپتارى ساقتالماعان. زاڭبۇزۋشىلىقتاردى جويۋ تۋرالى نۇسقاما بەرىلدى. كاسىپورىنعا سالىنعان اكىمشىلىك ايىپپۇلداردىڭ كولەمى — 5 ملن تەڭگە», — دەلىنگەن ەكولوگيا دەپارتامەنتى تاراتقان حابارلامادا.

بەرىلگەن نۇسقامالاردىڭ ورىندالۋى بويىنشا 2022 جىلدىڭ ەكىنشى جارتىجىلدىعىندا كاسىپورىندا جوسپاردان تىس تەكسەرۋ جۇرگىزىلەدى.

بۇدان بۇرىن ەكولوگيا دەپارتامەنتى تاراز ماڭىنداعى حيميا زاۋىتىنىڭ جۇمىسى توقتاتىلۋى مۇمكىن ەكەنىن مالىمدەگەن. كەيىننەن كومپانيا باسشىلىعى زاڭسىز پايدا تاپتى دەگەن كۇدىككە ءىلىندى. باس پروكۋراتۋرا «قازفوسفاتتى» 697 ملن تەڭگە كولەمىندە مونوپوليالىق تابىس تاپتى دەپ ايىپتاپ، تەرگەۋ باستالعانىن جاريالاعان ەدى.

”ادىرنا” ۇلتتىق پورتالى

پىكىرلەر