استانانىڭ مامانداندىرىلعان اۋدانارالىق اكىمشىلىك قۇقىق بۇزۋشىلىقتار جونىندەگى سوتى ۇلتتىق بانك توراعاسىنىڭ ورىنباسارى ءاليا مولدابەكوۆاعا اكىمشىلىك ايىپپۇل سالدى، دەپ حابارلايدى "ادىرنا" ءتىلشىسى Orda-عا سىلتەپ.
ءىس جوعارى اۋديتورلىق پالاتانىڭ ۇلتتىق بانكتىڭ اكتيۆتەردى پايدالانۋىنا جانە زەينەتاقى اكتيۆتەرىن باسقارۋىنا جۇرگىزگەن اۋديتىنەن كەيىن قارالدى. تەكسەرۋ قورىتىندىسى بويىنشا 2025 جىلى جەلتوقساندا ۇلتتىق بانككە 35 تارماقتان تۇراتىن نۇسقاما بەرىلگەن. ونىڭ ەكى تارماعى بەلگىلەنگەن مەرزىمدە ورىندالماعان. ءبىرىنشى تالاپ ينۆەستيتسيالىق پورتفەلدى باسقارۋعا قاتىسى جوق قىزمەتكەرلەرگە تولەنگەن سىياقىلاردى قايتارۋعا قاتىستى بولعان. ۇلتتىق بانك بۇل قاراجاتتى 2026 جىلدىڭ 1 ساۋىرىنە دەيىن قايتارۋى ءتيىس ەدى. الايدا رەتتەۋشى ازاماتتىق كودەكس نورمالارىنا سۇيەنە وتىرىپ، تولەمدەردىڭ جۇمىس بەرۋشىنىڭ اكتىلەرى نەگىزىندە جۇرگىزىلگەنىن جانە ولاردى نەگىزسىز بايۋ رەتىندە قايتارۋ مۇمكىن ەمەستىگىن حابارلاعان.
ەكىنشى تالاپقا سايكەس، ۇلتتىق بانك 2026 جىلعى 20 ناۋرىزعا دەيىن «قازاقستان ۇلتتىق بانكىنىڭ ۇلتتىق ينۆەستيتسيالىق كورپوراتسياسى» اق ءۇشىن كوميسسيالىق سىياقىنى ەسەپتەۋدىڭ بىرىڭعاي ءتاسىلىن ازىرلەۋى قاجەت بولعان. الايدا مەرزىمدى 31 تامىزعا دەيىن ۇزارتۋ تۋرالى ءوتىنىش تەك 13 مامىردا جولدانعان.
سوت وتىرىسىندا ءاليا مولدابەكوۆا ءوز كىناسىن مويىنداماي، قۇقىق بۇزۋشىلىقتىڭ ەلەۋسىز ەكەنىن العا تارتىپ، ءىستى توقتاتۋدى سۇرادى. ال جوعارى اۋديتورلىق پالاتانىڭ وكىلى ۇلتتىق بانك تالاپتاردى ۋاقىتىندا ورىنداماعانىن جانە كەيبىر جاۋاپتاردىڭ اكىمشىلىك حاتتاما جاسالعاننان كەيىن عانا جولدانعانىن ايتتى. سوت ۇلتتىق بانك توراعاسى ورىنباسارىن اكىمشىلىك قۇقىق بۇزۋشىلىق تۋرالى كودەكستىڭ 462-بابىنىڭ 3-بولىگى («مەملەكەتتىك باقىلاۋ جانە قاداعالاۋ ورگاندارىنىڭ زاڭدى تالاپتارىن نەمەسە نۇسقامالارىن ورىنداماۋ نەمەسە تيىسىنشە ورىنداماۋ») بويىنشا كىنالى دەپ تانىپ، 15 ايلىق ەسەپتىك كورسەتكىش مولشەرىندە، ياعني 64 875 تەڭگە كولەمىندە ايىپپۇل سالدى.
سوت قاۋلىسى ازىرگە زاڭدى كۇشىنە ەنگەن جوق.
