ءماجىلىس دەپۋتاتى ەرمۇرات باپي فۋتبولدان قازاقستان قۇراماسىنىڭ باپكەرى ستانيسلاۆ چەرچەسوۆكە ءتىلدى سىيلاپ، كومانداعا قۇرمەتپەن قاراۋعا كەڭەس بەردى، دەپ حابارلايدى “ادىرنا” ۇلتتىق پورتالى.
«چەرچەسوۆكە ۇلكەن سالەم. مەن چەرچەسوۆكە كەڭەس بەرەر ەدىم. ونىڭ فاميلياسىنان كوپ نارسە اڭعارىلادى. ول جاتتىقتىرۋشىلىق قىزمەتىن عانا ەمەس، قازاقستاننىڭ «ۇلتتىق» قۇراماسى اتانعان كوماندانى دا قۇرمەتتەۋگە جانە وعان تولىق جاۋاپكەرشىلىكپەن قاراۋى كەرەك. ول كلۋبتى ەمەس، ۇلتتىق قۇرامانى جاتتىقتىرۋعا كەلدى. ال ۇلتتىڭ باستى قاسيەتىنىڭ ءبىرى – ءتىل.
ۇلتتىق قۇرامانىڭ باپكەرىنە شاقىرسا دا، تىلگە قۇرمەتپەن قارا»، – دەدى باپي سارسەنبى كۇنى ءماجىلىس سىرتىندا.
ەسكە سالايىق، بۇعان دەيىن چەرچەسوۆ قازاقستاندىق ءجۋرناليستىڭ مەملەكەتتىك تىلدە قويعان ساۋالىنا: «ءسىز قازىر فرانتسۋزشا سويلەيسىز بە؟» دەگەن سۇراقپەن جاۋاپ بەرگەن بولاتىن. رەسەيلىك ماماننىڭ مالىمدەمەسى قازاقستان حالقىنىڭ اشۋ-ىزاسىن تۋدىردى.
سونىمەن قاتار، ونىڭ مۇنداي مالىمدەمە جاساۋى ءبىرىنشى رەت ەمەس. 15 قازاندا تۋريزم جانە سپورت مينيسترلىگى قفف-دان چەرچەسوۆتىڭ قازاق تىلىندەگى سۇراققا قاتىستى مالىمدەمەسىنە تۇسىنىكتەمە تالاپ ەتتى.
ايتا كەتەيىك، ماۋسىم ايىندا چەرچەسوۆ قازاقستان فۋتبول قۇراماسىنىڭ جاتتىقتىرۋشىسى بولىپ تاعايىندالعاننان كەيىن قفف اتقارۋ كوميتەتىنەن سەگىز ادام كەتكەن بولاتىن.
بۇگىنگە دەيىن چەرچەسوۆتىڭ جەتەكشىلىگىمەن قازاقستان ۋەفا ۇلتتار ليگاسى اياسىندا ءتورت رەسمي ماتچ وتكىزىپ، فيفا رەيتينگىندە 109 ورىندى يەلەندى.
