اقمولا وبلىسىندا قورعالجىن اۋدانىنىڭ سوتى ەكس-اكىم جانات وماروۆقا قاتىستى قىلمىستىق ءىستى توقتاتىپ، ءىستى اكىمشىلىككە اۋىستىرىپتى. ەندىگى سەگىزىنشى سىنىپ وقۋشىسىن ساباپ تاستاعان اكىم جازادان وڭاي قۇتىلىپ كەتۋى ىقتيمال. ال ءىستىڭ وسىلاي جۇمسارۋىنا سوت ساراپتاماسى سەبەپ بولعان كورىنەدى، دەپ حابارلايدى كتك ارناسى.
الايدا بۇرىنعى اكىمنەن تاياق جەدىم دەگەن دياس مۇقاننىڭ اناسى بالاسىنىڭ جەڭىل جاراقات العانى تۋرالى ساراپتاما قورىتىندىسىنا سەنە الار ەمەس. ءدال وسى سەبەپتى قايتادان ساراپتاما تاعايىنداتىپ، اكىمدى جازالاماق نيەتتە.
14 جاستاعى دياس مۇقاننىڭ اتا-اناسىنىڭ سوزىنشە، ەكس-اكىم اناسى مەن اۋدان دەپۋتاتتارىن اراعا سالىپ، جابىرلەنۋشىلەردى كەشىرىم بەرۋگە ماجبۇرلەپ جۇرگەن كورىنەدى.
«ولار مەنىڭ بالامدى ويلامايدى. كەشىرىممەن كەلدى. الايدا بالامدى ەمدەتۋ، سول ارقىلى كومەك بەرۋ تۋرالى ويلامادى. ويلاپ وتىرعاندارى – تەك جانات وماروۆتىڭ جاعدايى. سوققى سالدارىنان بالام كەمىس بولىپ قالسا، نە ىستەر ەدى؟» – دەيدى دياستىڭ اكەسى تولەگەن كۇلپەيىسوۆ.
ال اۋداندىق سۋديانىڭ سوزىنشە، بۇل ىسكە قاتىستى ساراپتاما تاعايىندالىپ، ونىڭ قورىتىندىسى شىققاندىقتان، جانات وماروۆتى قىلمىستىق جاۋاپقا تارۋعا ايتارلىقتاي سەبەپ جوق. ساراپتاما قورىتىندىسى بويىنشا، دياستىڭ العان جاراقاتى جەڭىل. ءىستىڭ اكىمشىلىككە اۋىستىرىلۋىنا ءدال وسى ساراپتاما قورىتىندىسى سەبەپ بولىپتى.
«سوت-مەديتسينالىق ساراپتامانىڭ قورىتىندىسى شىقتى. وندا ءجاسوسپىرىمنىڭ دەنساۋلىعىنا جەڭىل جاراقات كەلتىرىلگەنى كورسەتىلگەن. سوندىقتان وماروۆتى قىلمىستىق جاۋاپكەرشىلىككە تارتۋعا نەگىز جوق»، – دەيدى قورعالجىن اۋدانى سوتىنىڭ توراعاسى دانيار تەمىرحانوۆ.
الايدا دياستىڭ اتا-اناسى ساراپتاما قورىتىندىسىمەن كەلىسپەي وتىر. ولاردىڭ سوزىنشە، ۇلدارى ايعا جۋىق ۋاقىت ەمدەلسە دە، ءالى دە تولىق ساۋىقپاپتى. سونداي-اق، سوققى سالدارىنان ۇنەمى باسى اۋىراتىن كورىنەدى. وسى سەبەپتى ولار ءىستىڭ توقتاتىلعانىنا قارسى. ولار ەكس-اكىمدى جازاعا تارتۋ ءۇشىن، قايتادان ساراپتاما تاعايىنداۋعا ءوتىنىش بىلدىرگەن.
دياستىڭ اتا-اناسىنىڭ ارەكەتىن سۋديا قولداپ، ەكىنشى رەت ساراپتاما تاعايىنداعان. قايتادان تاعايىندالعان ساراتاما ءبىر ايعا جۋىق جاسالۋى مۇمكىن.
قازىرگى ۋاقىتتا دياس مۇقان ينتەرناتقا قايتا ورالعان. الايدا كوپ ساباقتى جىبەرىپ العاندىقتان، ۇلگەرىمىنە اسەرىن تيگىزبەي قويماپتى.
ەكىنشى قايتارا تاعايىندالعان ساراپتاما ناتيجەسى وزگەرمەسە، بۇرىنعى اكىمگە قاتىستى 35 مىڭ تەڭگە ايىپپۇل نەمەسە 15 تاۋلىككە قاماۋ تۇرىندەگى اكىمشىلىك جازا تاعايىندالۋى مۇمكىن. ال ساراپتاما قورىتىندىسى دياستىڭ دەنساۋلىعىنا ايتارلىقتاي زاقىم كەلگەنىن راستاسا، جانات وماروۆ ەكى جىلعا دەيىن باس بوستاندىعىنان ايىرىلۋى ىقتيمال.
ەستەرىڭىزگە سالا كەتسەك، اقمولا وبلىسىندا 8-سىنىپ وقۋشىسىن سوققىعا جىققان قورعالجىن اۋىلدىق وكرۋگىنىڭ اكىمى جانات وماروۆتىڭ ۇستىنەن ءىس قوزعالعان ەدى. ول تولەۋباەۆ اتىنداعى ورتا مەكتەپتىڭ وقۋشىسى دياس مۇقاندى سوققىعا جىعىپ، دەنساۋلىعىنا زيان كەلتىرگەن.
__________________________________________________________________________________________________________________ Ktk.kz
