اقتوبە وبلىسى اكىمىنىڭ ءبىرىنشى ورىنباسارى رۋسلان حامباروۆ ءوزىن ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ كۇيەۋ بالاسى دەگەن اقپاراتتى جالعان دەپ اتادى، دەپ حابارلايدى "ادىرنا" پورتالى.
«مەن قايرات ساتىبالدىنىڭ كۇيەۋ بالاسىمىن دەگەن اقپاراتقا كەلەتىن بولساق، بۇل جالعان اقپارات. مەنىڭ قايىن اتام – ەڭبەك سىڭىرگەن سپورتشى، ەكى دۇركىن كسرو چەمپيونى، ەۋروپا چەمپيونى، سامبودان الەم كۋبوگىنىڭ يەگەرى. بۇل اتاقتى دزيۋدوشى، سامبيست ايتجان شاڭعاراەۆ. ايەلىم ەكەۋمىز ءۇشىنشى بالامىزدىڭ دۇنيەگە كەلۋىن كۇتۋدەمىز، سوندىقتان 17 ناۋرىزدان باستاپ كەزەكتى ەڭبەك دەمالىسىندا بولدىم. مەن جاقىن ارادا ءوز مىندەتىمە قايتا كىرىسەمىن»، - دەپ حامباروۆ ساتىبالدىنىڭ كۇيەۋ بالاسى جانە وتستاۆكاعا كەتۋگە نيەتتى ەكەندىگى تۋرالى اقپاراتقا تۇسىنىكتەمە بەردى.
ەسكە سالايىق، 13 ناۋرىزدا قازاقستاننىڭ ەكس-پرەزيدەنتى نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ قىزمەتتىك وكىلەتتىگىن اسىرا پايدالانۋ جانە «قازاقتەلەكوم» اق قارجىسىن جىمقىرۋ فاكتىلەرى بويىنشا الماتىدا ۇستالىپ، ۋاقىتشا ۇستاۋ يزولياتورىنا قاماۋعا الىنعانى بەلگىلى بولدى. ساتىبالدىنىڭ مەملەكەت قاۋىپسىزدىگىنە نۇقسان كەلتىرەتىن باسقا دا قىلمىستارعا قاتىستىلىعى دا قازىر تەكسەرىلىپ جاتىر. سول كۇنى باق دەرەككوزدەرى حابارلاعانداي، نازارباەۆتىڭ نەمەرە ءىنىسى نۇر-سۇلتاندا قاماۋدا بولادى. نازارباەۆتىڭ نەمەرە ءىنىسىن ۇستاۋدى ۇقك ارىستان ارنايى بولىمشەسىنىڭ قىزمەتكەرلەرى جۇرگىزگەن.
14 ناۋرىزدا «قازاقتەلەكوم» كەڭسەلەرىندە تىنتۋلەر جۇرگىزىلگەنى بەلگىلى بولدى، وپەراتوردىڭ ءوزى بۇل اقپاراتقا تۇسىنىكتەمە بەرۋدەن باس تارتتى، بىراق ول تىنتۋلەر ەلوردا مەن الماتى بولىمشەلەرىندە ءجۇرىپ جاتقانىن كورسەتتى.
ناۋرىزدىڭ 23-ءى كۇنى ىلە-الاتاۋ مەملەكەتتىك ۇلتتىق تابيعي پاركىنىڭ كۇزەت ايماعىنا جاقىن تاۋلاردان ساتىبالدىعا تيەسىلى بولۋى مۇمكىن زاڭسىز سالىنعان ۆيللا تابىلعانى حابارلانعان بولاتىن.
"ادىرنا" ۇلتتىق پورتالى
