وقۋ-اعارتۋ ءمينيسترى عاني بەيسەمباەۆ جىل وتكەن سايىن مۇعالىمدەردى ارتىق جۇمىسقا تارتۋ ماسەلەسى بويىنشا كەمشىلىكتەردىڭ ازايىپ كەلە جاتقانىن جەتكىزدى، دەپ حابارلايدى «ادىرنا» ءتىلشىسى.
«2019 جىلمەن سالىستىرعاندا مۇعالىمدەردى ارتىق جۇمىستارعا تارتۋ، وزىنە تيەسىلى ەمەس نارسەلەرگە اينالدىرۋ باعىتىنداعى كوپتەگەن كەمشىلىكتىڭ ازايىپ كەلە جاتقانىن كورىپ وتىرمىز. ەگەر بۇرىنعى جىلدارى شاعىمدار وتە كوپ بولسا، قازىر وعان قاتىستى شاعىمدار ازايعان. دەسە دە، كەيىنگى كەزدەرى مەكتەپتىڭ ءوزىنىڭ جەكە باستاما كوتەرۋىمەنەن مۇعالىمدەرگە كەيبىر قاعازباستىلىقتى نەمەسە ەسەپتىلىكتى كوبەيتىپ جاتقانىن دا كورىپ وتىرمىز. مينيسترلىك نەمەسە وبلىستىق ءبىلىم بەرۋ باسقارماسى تاراپىنان قانداي دا ءبىر قوسىمشا قاجەتسىز اقپاراتتاردى كوبەيتەتىندىگى تۋرالى ماعان اقپارات جەتكەن جاعدايدا ول شۇعىل قولعا الىنىپ، جولى كەسىلىپ وتىرادى»،—دەدى ول بۇگىن ءماجىلىس كۋلۋارىندا.
سونداي-اق مينيستر مۇعالىمدەردى سەنبىلىككە شىعارۋ ماسەلەسىن دە كوتەردى.
«بىلتىر سەنبىلىككە شىعارۋ ماسەلەسى تۋرالى مۇعالىمدەر كوپ شاعىمداندى. بۇل مەكتەپ اۋلاسى بولسا، باسقا اڭگىمە، ويتكەنى بالالاردى ەڭبەككە باۋلۋىمىز كەرەك، ونى مۇعالىمدەر جەكە ءوزى ۇلگى ەتىپ كورسەتۋى كەرەك. بايقاساڭىزدار مەن دە مەكتەپ اۋلاسىنا اعاش ەگەمىن، بۇل وتە ۇلگىلى نارسە. بىراق مەكتەپتەن تىس، مەكتەپكە قاتىسى جوق جەرلەرگە تارتۋ – مۇعالىمدى نەگىزگى فۋنكتسياسىنان الاڭداتادى. مۇعالىمنىڭ باستى مىندەتى – بالالارعا ساپالى ءبىلىم مەن سانالى تاريبە بەرۋ. ودان باسقاسىنا الاڭداتا بەرۋدىڭ قاجەتى جوق»،—دەپ تولىقتىردى بەيسەمباەۆ.
