Oqý-aǵartý mınıstri Ǵanı Beısembaev jyl ótken saıyn muǵalimderdi artyq jumysqa tartý máselesi boıynsha kemshilikterdiń azaıyp kele jatqanyn jetkizdi, dep habarlaıdy «Adyrna» tilshisi.
«2019 jylmen salystyrǵanda muǵalimderdi artyq jumystarǵa tartý, ózine tıesili emes nárselerge aınaldyrý baǵytyndaǵy kóptegen kemshiliktiń azaıyp kele jatqanyn kórip otyrmyz. Eger burynǵy jyldary shaǵymdar óte kóp bolsa, qazir oǵan qatysty shaǵymdar azaıǵan. Dese de, keıingi kezderi mekteptiń óziniń jeke bastama kóterýimenen muǵalimderge keıbir qaǵazbastylyqty nemese eseptilikti kóbeıtip jatqanyn da kórip otyrmyz. Mınıstrlik nemese oblystyq bilim berý basqarmasy tarapynan qandaı da bir qosymsha qajetsiz aqparattardy kóbeıtetindigi týraly maǵan aqparat jetken jaǵdaıda ol shuǵyl qolǵa alynyp, joly kesilip otyrady»,—dedi ol búgin Májilis kýlýarynda.
Sondaı-aq mınıstr muǵalimderdi senbilikke shyǵarý máselesin de kóterdi.
«Byltyr senbilikke shyǵarý máselesi týraly muǵalimder kóp shaǵymdandy. Bul mektep aýlasy bolsa, basqa áńgime, óıtkeni balalardy eńbekke baýlýymyz kerek, ony muǵalimder jeke ózi úlgi etip kórsetýi kerek. Baıqasańyzdar men de mektep aýlasyna aǵash egemin, bul óte úlgili nárse. Biraq mektepten tys, mektepke qatysy joq jerlerge tartý – muǵalimdi negizgi fýnkııasynan alańdatady. Muǵalimniń basty mindeti – balalarǵa sapaly bilim men sanaly tárıbe berý. Odan basqasyna alańdata berýdiń qajeti joq»,—dep tolyqtyrdy Beısembaev.
