اسكەردە جارالانعان ەربايان مۇحتاردىڭ ادۆوكاتى تەرگەۋشىنىڭ ۇستىنەن شاعىم تۇسىرگەن، دەپ حابارلايدى "ادىرنا" ۇلتتىق پورتالى.
ادۆوكات ينگا يمانباي ءىس بويىنشا تەرگەۋشىنىڭ ۇستىنەن شاعىم تۇسىرگەنىن جازدى. سەبەبى ءىس توقتاپ قالعان.
"ەربايان مۇحتاردىڭ ءىسى بويىنشا تەرگەۋشىگە ىزدەۋ سالامىن. بۇل قالجىڭ ەمەس. وكىنىشكە وراي تەرگەۋ بويىنشا جاعداي وسىنداي بولىپ تۇر. وقيعا بولعانىنا جىلعا جۋىق ۋاقىت وتكەنىمەن، ءالى دە تەرگەۋ ورنىنان قوزعالماي تۇر. مەن ىسكە قورعاۋشى رەتىندە كىرىسكەن بەسىنشى ايدىڭ ىشىندە تەرگەۋشى ءۋاليحان قىدىرباي سوت مەديتسينالىق ساراپتامادان وزگە تەرگەۋ امالىن جاساعان جوق. وقيعا ورنىنان فوتو، ۆيدەو، ءىس ماتەريالدارىمەن تانىستىرعان جوق. ءىس بويىنشا تۋىنداعان ساۋالدارعا جاۋاپ الۋ ءۇشىن حابارلاسساق، تەلەفون قوڭىراۋلارىنا جاۋاپ بەرمەيدى. سوت-مەديتسينالىق ساراپتاما قورىتىندىسى شىقتى ما، ءىس بويىنشا باسقا دا ءمان جايلاردى ءبىلۋ مۇمكىن ەمەس. سوندىقتان، كەشە تەرگەۋشىنىڭ ۇستىنەن ىسىنە قۇقىقتىق باعا بەرىپ، قىلمىستىق ءىستى تەرگەۋ قانداي ساتىدا ەكەنىنەن اقپارات الۋ ءۇشىن باس پروكۋراتۋراعا شاعىم تۇسىرۋگە ءماجبۇر بولدىم. ەندى جاۋابىن كۇتەمىز", – دەپ جازدى ينگا يمانباي جەلىدەگى پاراقشاسىندا.
ايتا كەتەيىك، ەربايان مۇحتارۇلى 22 جاستا. وتباسىندا 4 بالانىڭ ۇلكەنى. ول اسكەرگە ءوزى سۇرانىپ بارعان. بىرنەشە ايدان كەيىن كوماعا ءتۇسىپ، اۋرۋحاناعا جەتكىزىلگەن. اسكەردە العان جاراقاتىنان 6 اي كومادا جاتقان سارباز ەربايان مۇحتاردىڭ جاعدايى ەلدى الاڭداتقان ەدى.
