Áskerde jaralanǵan Erbaıan Muhtardyń advokaty tergeýshiniń ústinen shaǵym túsirgen, dep habarlaıdy "Adyrna" ulttyq portaly.
Advokat Inga Imanbaı is boıynsha tergeýshiniń ústinen shaǵym túsirgenin jazdy. Sebebi is toqtap qalǵan.
"Erbaıan Muhtardyń isi boıynsha tergeýshige izdeý salamyn. Bul qaljyń emes. Ókinishke oraı tergeý boıynsha jaǵdaı osyndaı bolyp tur. Oqıǵa bolǵanyna jylǵa jýyq ýaqyt ótkenimen, áli de tergeý ornynan qozǵalmaı tur. Men iske qorǵaýshy retinde kirisken besinshi aıdyń ishinde tergeýshi Ýálıhan Qydyrbaı sot medıınalyq saraptamadan ózge tergeý amalyn jasaǵan joq. Oqıǵa ornynan foto, vıdeo, is materıaldarymen tanystyrǵan joq. Is boıynsha týyndaǵan saýaldarǵa jaýap alý úshin habarlassaq, telefon qońyraýlaryna jaýap bermeıdi. Sot-medıınalyq saraptama qorytyndysy shyqty ma, is boıynsha basqa da mán jaılardy bilý múmkin emes. Sondyqtan, keshe tergeýshiniń ústinen isine quqyqtyq baǵa berip, qylmystyq isti tergeý qandaı satyda ekeninen aqparat alý úshin Bas prokýratýraǵa shaǵym túsirýge májbúr boldym. Endi jaýabyn kútemiz", – dep jazdy Inga Imanbaı jelidegi paraqshasynda.
Aıta keteıik, Erbaıan Muhtaruly 22 jasta. Otbasynda 4 balanyń úlkeni. Ol áskerge ózi suranyp barǵan. Birneshe aıdan keıin komaǵa túsip, aýrýhanaǵa jetkizilgen. Áskerde alǵan jaraqatynan 6 aı komada jatqan sarbaz Erbaıan Muhtardyń jaǵdaıy eldi alańdatqan edi.
