ءماجىلىس دەپۋتاتى داۋلەت مۇقاەۆ قازاق سىنىپتارىندا وقىتىلاتىن ورىس ءتىلى ءپانى باعدارلاماسىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
داۋلەت مۇقاەۆ قازاق سىنىپتارىنداعى ەكىنشى سىنىپ وقۋشىلارىنا ارنالعان ورىس ءتىلى وقۋلىقتارى تىم قيىن ەكەنىن ايتتى. مۇقاەۆتىڭ سوزىنشە، ورىس ءتىلى كىتاپتارىندا وقۋ جىلى باستالعاننان-اق سويلەم قۇراۋ، ولەڭ جاتتاۋ سەكىلدى كۇردەلى تاپسىرمالار بەرىلگەن. دەپۋتاتتىڭ پىكىرىنشە، الدىمەن الفاۆيتتەن باستاپ ۇيرەتۋ قاجەت.
«مەنىڭ وتباسىمدا بالالار ورىس تىلىندە مۇلدە سويلەمەيدى، سوندىقتان ولار ءۇشىن وتە قيىن. ولار تۇگىلى مىنا ءوزىمىز اتا-انا رەتىندە دە قينالامىز. سونىمەن قاتار، ورىس تىلىندەگى سىنىپتاردا قازاق ءتىلىن وقىتۋ باعدارلاماسى الدەقايدا جەڭىلدەۋ. ولاردا تاپسىرمالار جەڭىل – سوزدەگى جەتىسپەيتىن ءارىپتى قويۋ سياقتى قاراپايىم تاپسىرمالار. ال قازاق سىنىپتارىنداعى بالالاردىڭ تاپسىرمالارى فيلولوگ ماماندى دايىنداعانداي. بۇل جاعدايدا وقۋلىقتاردى جەڭىلدەتۋ قاجەت دەپ سانايمىن»، – دەدى دەپۋتات.
ودان بولەك، داۋلەت مۇقاەۆ مەكتەپتەردەگى گرامماتيكا ماسەلەسى دە اقساڭداپ تۇرعانىن ايتتى. سەبەبى كەيبىر مۇعالىمدەر قاراپايىم سوزدەردە قاتە جىبەرىپ جاتادى.
دەپۋتات جاڭا ستاندارت بويىنشا ينفورماتيكا ءپانىن الىپ تاستاۋدى ۇسىندى. بۇل شەشىمنىڭ قانداي زەرتتەۋلەر نەگىزىندە قابىلدانعانىن سۇراپ، ونىڭ ناتيجەلەرىن جاريالاۋدى تالاپ ەتتى.
