ەندى "لاگەر" اتاۋى "ساۋىقتىرۋ ورتالىقتارى" اتاۋىمەن اۋىستىرىلاتىن بولادى. ودان بولەك بالالاردىڭ ساۋىقتىرۋ جۇمىستارىن ۇيىمداستىرۋ بويىنشا بىرىڭعاي تالاپتار مەن ەرەجەلەر بەكىتىلمەك، دەپ حابارلايدى "ادىرنا" ءتىلشىسى.
ءار جاز سايىن جازعى ساۋىقتىرۋ لاگەرىنە اتتاناتىن بالالار كوپ. الايدا كەيبىر لاگەرلەردىڭ كەلبەتى جاعا ۇستاتارلىق جاعدايدا بولعانىن الەۋمەتتىك جەلىدە جەلدەي ەسكەن بىرنەشە بەينەجازبادان اڭعارۋعا بولادى. بالالاردىڭ دەمالۋىنا ارنالعان لاگەرلەر كوپشىلىكتىڭ نازارىنان تىس قالعانى جاسىرىن ەمەس.
بيىل رەسپۋبليكا كولەمىندە قالا سىرتىندا 218 جانە مەكتەپ جانىندا 10.000-نان اسا لاگەر ءوز جۇمىسىن باستادى دەپ حابارلانعان ەدى. الايدا ناقتى باقىلاۋ بولماعاندىقتان بۇل تەك قاعاز بەتىنە ەنگەنى بولىپ شىقتى.
وسى تۇستا دەپۋتات داۋلەت مۇقاەۆ بالالار لاگەرى تەك پايدا تابۋدىڭ كوزىنە اينالعانىن اتاپ وتكەن ەدى. ءماجىلىس دەپۋتاتى بالالاردىڭ جازعى بوس ۋاقىتىن ۇيىمداستىرۋدىڭ بىرىڭعاي قاعيدالارىن ەنگىزىپ، بەكىتۋ تۋرالى ۇكىمەت باسشىسى ءاليحان سمايىلوۆقا، وقۋ-اعارتۋ ءمينيسترى عاني بەيسەمباەۆقا بىرنەشە اي بۇرىن دەپۋتاتتىق ساۋال جولداعان بولاتىن:
"بىرىنشىدەن، جازعى ۋاقىتتاردا بالالاردىڭ ساۋىقتارۋ جۇمىسىتارىن ۇيىمداستىرۋ بويىنشا بىرىڭعاي تالاپتار مەن ەرەجەلەردى بەكىتۋ كەرەك. لاگەر ۇيىمداستىرۋشىلار مىندەتتى تۇردە مەملەكەتتىك مەكەمە تاراپىنان لاگەر مازمۇنى مەن ماتەريالدىق-تەحنيكالىق بازالارىنا سايكەس تەكسەرۋدەن ءوتىپ، ليتسەنزيالانۋى كەرەك. مۇمكىندك بولسا بارلىق لاگەرلەر ورتالىقتاندىرىلعان بىرىڭعاي سايتتا بولعانى ابزال".
بۇگىندە لاگەر جىرىن قوزعاعان داۋلەت مۇقاەۆتىڭ دەپۋتاتتىق ساۋالىنا پرەمەر-مينيستر وڭ جاۋاپ بەردى. دەپۋتاتتارعا جولدانعان جاۋاپ حاتتا بالالاردىڭ ساۋىقتىرۋ ورتالىقتارى قىزمەتىن ليتسەنزيالاۋ، دەمالىس ورىندارىنلاعى وقىتۋ كۋرستارىن ۇيىمداستىرۋ جۇمىستارى جانە لاگەر اتىن الماستىرۋ ماسەلەسىنە قاتىستى بىرقاتار وزگەرىستەردى ەنگىزۋ تۋرالى شەشىم قابىلدانعانى كورسەتىلگەن.
"جالپى، جازعى دەمالىستى ۇيىمداستىرۋ ماسەلەلەرى پرەمەر-ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى ت.ب. دۇيسەنوۆانىڭ 2023 جىلعى 28 شىلدەدەگى وتىرىسىندا قارالدى. مۇددەلى ورتالىق جانە جەرگىلىكتى اتقارۋشى ورگاندارعا ءتيىستى تاپسىرمالار بەرىلدى.
جازعى ۋاقىتتا بالالاردى ساپالى ءارى مازمۇندى دەمالىسپەن، ساۋىقتىرۋمەن قامتۋ جانە بالالاردىڭ قاۋىپسىزدىگىن قامتاماسىز ەتۋ ۇكىمەتتىڭ ەرەكشە باقىلاۋىندا.", - دەپ كورسەتىلگەن ۇكىمەت باسشىسىنىڭ اتىنان جولدانعان رەسمي حاتتا.
ۇقساس جاڭالىقتار
