ءماجىلىس دەپۋتاتى داۋلەت مۇقاەۆ قازاقستاندا ءورت سوندىرۋشىلەردىڭ الەۋمەتتىك جاعدايى ءماز ەمەس ەكەنىنە توقتالدى. بۇل تۋرالى ول بۇگىن ماجىلىستەگى ۇكىمەت ساعاتىندا ايتتى، دەپ حابارلايدى “ادىرنا” ۇلتتىق پورتالى.
وتىرىسقا دەيىن دەپۋتاتتارعا ارنايى كورمە ۇيىمداستىرىلدى. وندا ءورت سوندىرۋگە ارنالعان جاڭا قۇرال-جابدىقتار قويىلدى. دەپۋتات بۇل قۇرالداردىڭ كۇندەلىكتى ومىردە قولدانىلمايتىنىن ايتىپ قىنجىلدى.
«جاڭا ءبىر كۇشتى كورمە بولدى. ونىڭ سۋرەتتەرىن الەۋمەتتىك جەلىگە سالعاندا كوپتەگەن ادام جازدى. ءتىپتى، ءورت سوندىرۋشىلەردىڭ ءوزى توتەنشە جاعدايدا بۇل قۇرالداردى كورمەدىك دەپ ايتىپ جاتىر. ويتكەنى اۋىلعا دا، اۋدانعا دا ولار جەتپەگەن»، - دەدى داۋلەت مۇقاەۆ.
ونىڭ پىكىرىنشە، بۇگىندە ءورت سوندىرۋشىلەرگە دۇرىس جاعداي جاسالماعان.
«بىرىنشىدەن، مەنى ءبىر قىنجىلتاتىن ماسەلە بار. قوستاناي وبلىسىندا جانە سەمەيدە ورمان ءورتى بولعاندا ءبىز حالىقتان قايىرىمدىلىق قورىنا 4 ملن تەڭگەگە جۋىق اقشا جينادىق. بۇل قارجىعا ءورت سوندىرۋشىلەرگە مايكا، بەرتسى، ءتىپتى، تاماققا دەيىن ساتىپ العان جاعدايلار بولدى. شۇلىق تا ساتىپ الدىق. بىلمەيمىن، قارجى مينيسترلىگىنە بيۋدجەتتەن قارجى بولىنەدى عوي. ونداعى ءورت سوندىرۋشىلەر ءورتتى ءسوندىردى. جەر دەگەن ىستىق. ءتىپتى، بەرتسىدىڭ ءوزى ىستىققا شىداماي، ەرىپ كەتىپ جاتتى. مۇنداي جاعدايدا اياقكيىم، ارنايى كيىم ساتىپ الۋ جاعى نەگە قاراستىرىلماعان؟» - دەدى دەپۋتات.
داۋلەت مۇقاەۆ ءورت سوندىرۋشىلەردىڭ ماسەلەسىن كوتەرگەندەر باسشىلىق تاراپىنان قىسىمعا ۇشىرايتىنىن دا جەتكىزدى.
«ەكىنشىدەن، ماعان ءورت سوندىرۋشىلەردىڭ مەكتەپتىڭ ەدەنىندە جاتقان سۋرەتتەرى ءتۇستى. مەن ونى الەۋمەتتىك جەلىگە سالعاندا، «ءوشىرىڭىزشى، ءوشىرىڭىزشى» دەدى. سۋرەتتى ماعان ءورت ءسوندىرۋشىنىڭ ايەلى جىبەرگەن بولاتىن. ول كۇيەۋىمدى جۇمىستا قىسپاققا الىپ جاتىر دەدى. ەلىمىزدە نەگە شىندىقتى ايتاتىن ادامدار قىسپاققا ءتۇسۋى كەرەك؟ ءولىم مەن ءومىردىڭ اراسىندا جۇرگەن جانداردان كوپ تۇسەتىن سۇراقتىڭ ءبىرى – تۇرعىن ءۇي تولەمى مەن ايلىق ماسەلەسىنە قاتىستى. بىلەسىزدەر، ولارعا ەشقانداي تولەم جوق. وسىنداي بايلىعى بار ەلدە مايكا، بەرتسى، شۇلىق الىپ بەرۋ – نونسەنس، - دەدى ول.
ەكولوگيا جانە تابيعي رەسۋرستار ءمينيسترى ەرلان نىسانباەۆ بۇل ماسەلە بىرتىندەپ شەشىلىپ جاتقانىن ايتتى.
«بيىل جالپى ورمان سالاسىنداعى قىزمەتكەرلەرگە 4 405 دانا ورتكە قارسى كيىم الۋ كەرەك دەپ بەكىتىلدى. وسىعان بايلانىستى 918 ملن تەڭگە ءبولىندى. بۇگىندە ءبىز تەك 2 مىڭ (ارنايى كيىمدى) الدىق. سەبەبى كونكۋرستىڭ كوپتەگەن قيىندىعىنا بايلانىستى 510 ملن تەڭگەنى عانا يگەردىك. قالعانىن (اقشانى) قايتارىپ بەردىك. كوكتەمدە قالعان 2 400 ارنايى كيىمدى الامىز دەپ وتىرمىز.
ارينە، وسى ۋاقىتقا دەيىن ءبىز (ورتكە قارسى كيىمگە) تالاي رەت وسىنداي اقشا كەرەك دەپ سۇرانىس بەردىك. دەگەنمەن وسىنداي جاعداي بولعاندا عانا ماسەلەگە نازار اۋداردىق، شىنىن ايتۋ كەرەك. بىراق 1-2 جىلدا ءبارىن (ارنايى كيىممەن) قامتاماسىز ەتەمىز. تۇرعىن ءۇي تولەمى ءبىزدىڭ ءورت سوندىرۋشىلەرگە بەلگىلەنبەگەن. بىراق ولارعا ارنايى پاكەت بولىنەدى»، - دەدى ۆەدومستۆو باسشىسى.
