قازاقستاندا رەسپۋبليكالىق اتوم ەلەكتر ستانتسياسىن سالۋ نەمەسە سالماۋ تۋرالى شەشىم قابىلدايتىن رەفەرەندۋم باستالدى، دەپ حابارلايدى «ادىرنا» ۇلتتىق پورتالى.
قازاقستان زاڭناماسىنا سايكەس رەفەرەندۋم – كونستيتۋتسيالاردىڭ، زاڭداردىڭ جانە قوعام ءومىرىنىڭ باسقا دا ماڭىزدى ماسەلەلەرى بويىنشا جالپىحالىقتىق داۋىس بەرۋ. ول «رەسپۋبليكالىق رەفەرەندۋم تۋرالى» كونستيتۋتسيالىق زاڭمەن رەتتەلەدى جانە ونى ارنايى قۇرىلعان كوميسسيا ۇيىمداستىرادى.
داۋىس بەرۋ 6 قازاندا سايلاۋ ۋچاسكەلەرىندە ساعات 07:00-دەن 20:00-گە دەيىن وتەدى. رەسپۋبليكادا 10 مىڭنان استام سايلاۋ ۋچاسكەلەرى بار. ءبىرىنشى بولىپ شەتەلدە - سەۋل مەن توكيودا ۋچاسكەلەر اشىلدى.
رەفەرەندۋمعا 18 جاسقا تولعان قازاقستاننىڭ بارلىق ازاماتتارى داۋىس بەرۋگە قۇقىلى. داۋىس بەرۋ بيۋللەتەندەرى قازاق جانە ورىس تىلدەرىندە جازىلعان. رەفەرەندۋمدا ازاماتتار «ءسىز قازاقستاندا اتوم ەلەكتر ستانساسىنىڭ سالىنۋىمەن كەلىسەسىز بە؟» دەگەن سۇراققا جاۋاپ بەرۋى كەرەك. جاۋاپتىڭ ەكى نۇسقاسى بار: «ءيا، كەلىسەمىن» جانە «جوق، كەلىسپەيمىن».
ورتالىق رەفەرەندۋم كوميسسياسىنىڭ ونىڭ قورىتىندىلارى تۋرالى رەسمي حابارلاماسى داۋىس بەرۋ كۇنىنەن باستاپ جەتى كۇننەن كەشىكتىرمەي بۇقارالىق اقپارات قۇرالدارىندا جاريالانادى.
