قازاقستاندا اەس سالۋ بويىنشا رەفەرەندۋمنىڭ قورىتىندىسى جاريالانعاننان كەيىن “روساتومنىڭ” باس ديرەكتورى الەكسەي ليحاچەۆ قازاقستان پرەزيدەنتى قاسىم جومارت توقاەۆپەن كەزدەسۋدى سۇراعان. بۇل تۋرالى رەسەي ەلشىلىگىنىڭ حاتى دەلىنگەن قۇجاتتىڭ كوشىرمەسى جەلىگە تارادى، دەپ حابارلايدى “ادىرنا” ۇلتتىق پورتالى.
ايتا كەتەيىك، 6 قازان كۇنى قازاقستاندا اتوم ەلەكتر ستانساسىن سالۋ بويىنشا رەفەرەندۋم وتكەن بولاتىن. ونىڭ داۋلى ناتيجەسى ەلدە اتوم ەلەكتر ستانتسياسى سالىنادى دەگەن شەشىممەن اياقتالدى.
رەفەرەندۋم قورىتىندىسى 8 قازان جاريالانعاننان كەيىن “روساتومنىڭ” باس ديرەكتورى الەكسەي ليحاچەۆ قازاقستان پرەزيدەنتى قاسىم جومارت توقاەۆ جانە پرەمەر-مينيستر ولجاس بەكتەنوۆپەن كەزدەسۋدى سۇراعان. ءتيىستى ساۋال 11 قازاندا ديپلوماتيالىق ارنالار ارقىلى جىبەرىلگەن.
اتالعان قۇجات جەلىدە تارادى.
ايتا كەتەيىك، ادەتتە مۇنداي كەزدەسۋلەردىڭ قۇپيالىلىعى ساقتالاتىن.
سونىمەن قاتار، 15 قازان رەسەي پرەزيدەنتى ۆلاديمير پۋتين «روساتوم» اتوم ەنەرگياسى جونىندەگى مەملەكەتتىك كورپوراتسياسىنىڭ باس ديرەكتورى الەكسەي ليحاچەۆپەن كەزدەستى. بۇل تۋرالى كرەملدىڭ رەسمي سايتىندا جاريالاندى.
كەزدەسۋ بارىسىندا مەملەكەتتىك كورپوراتسيانىڭ اعىمداعى قىزمەتى تالقىلاندى. اتاپ ايتقاندا، «روساتوم» باسشىسى پۋتينگە كومپانيانىڭ ەكونوميكالىق كورسەتكىشتەرى، شەتەلدىك جوبالار مەن عىلىمي ازىرلەمەلەر، سونداي-اق مەملەكەتتىك قورعانىس تاپسىرىسىن ورىنداۋ جانە ەلدىڭ كولىك ەگەمەندىگىن قامتاماسىز ەتۋ جۇمىستارىنىڭ بارىسى تۋرالى باياندادى.
الەكسەي ليحاچەۆتىڭ ايتۋىنشا، سىرتقى سىن-قاتەرلەرگە قاراماستان، كورپوراتسيا دامۋدىڭ ماڭىزدى پارامەترلەرىن ساقتاي الدى – اعىمداعى جوبالاردى نىعايتىپ قانا قويماي، سونىمەن بىرگە، ەڭ الدىمەن، عىلىمي-تەحنيكالىق دامۋ تۇرعىسىنان بولاشاققا ەلەۋلى نەگىز جاساي الدى.
