الماتى وبلىسىنىڭ كيبەرپوليتسەيلەرى 170-تەن استام ينتەرنەت-سايتتى بۇعاتتادى. بۇل تۋرالى Polisia.kz مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ىشكى ىستەر مينيسترلىگىنىڭ كيبەرقىلمىسقا، ونىڭ ىشىندە ينتەرنەت-الاياقتىققا قارسى ءىس-قيمىل جونىندەگى باعدارلاماسى شەڭبەرىندە الماتى وبلىسى پوليتسيا دەپارتامەنتىنىڭ كريمينالدىق پوليتسيا باسقارماسى جىل باسىنان بەرى ايتارلىقتاي ناتيجەلەرگە قول جەتكىزدى.
جەدەل-ىزدەستىرۋ ءىس-شارالارى بارىسىندا ءتۇرلى سيپاتتاعى 46 قىلمىستىق ىسكە قاتىسى بار 74 كۇدىكتى انىقتالدى. جۇمىس قورىتىندىسى بويىنشا 117 قىلمىستىق ءىس اياقتالىپ، سوتقا جولداندى، بۇل ينتەرنەت-قىلمىسكەرلەرمەن كۇرەسكە بايىپتى كوزقاراستى ايعاقتايدى.
“وپەراتسيا بارىسىندا اقشا قاراجاتتارىنىڭ زاڭسىز اينالىمىمەن اينالىسقان 62 تۇلعا ۇستالدى. كيبەركەڭىستىكتىڭ تۇراقتى مونيتورينگى ناتيجەسىندە الاياقتىق ارەكەتتەر جۇزەگە اسىرىلعان 177 جالعان ينتەرنەت-سايتتاردى بۇعاتتاۋعا مۇمكىندىك تۋدى. سونداي-اق، كيبەرقىلمىسقا كۇدىكتى 56 ادامنىڭ شوتتارى جابىلىپ، زارداپ شەككەندەرگە 36 ملن 462 مىڭ تەڭگە سوماداعى اقشالاي قاراجات قايتارىلدى”، – دەپ تۇيىندەدى الماتى وبلىسى پد كپب باستىعىنىڭ ورىنباسارى نۇرجان كەڭەسحانۇلى.
كريمينالدىق پوليتسيا باسقارماسى ينتەرنەت-الاياقتىق سالاسىنداعى قىلمىستاردىڭ الدىن الۋ جانە اشۋ بويىنشا بەلسەندى جۇمىسىن جالعاستىرۋدا. وبلىس تۇرعىندارى مەن قوناقتارىنا ونلاين-ساتىپ الۋلار مەن قارجىلىق وپەراتسيالاردى جۇزەگە اسىرۋ كەزىندە قىراعىلىق تانىتۋعا، ال كۇدىك تۋىنداعان جاعدايدا دەرەۋ قۇقىق قورعاۋ ورگاندارىنا جۇگىنۋگە كەڭەس بەرەدى.
ۇقساس جاڭالىقتار
