ءماجىلىس دەپۋتاتى تەمىر قىرىقباەۆ «بانكتەر جانە بانك قىزمەتى تۋرالى» زاڭ جوباسىنىڭ ءبىرىنشى وقىلىمىندا قارجى نارىعىن رەتتەۋ جانە دامىتۋ اگەنتتىگى ءتورايىمى ءمادينا ابىلقاسىموۆاعا دەپۋتاتتىق ساۋال جولدادى، دەپ حابارلايدى «ادىرنا» ءتىلشىسى.
دەپۋتاتتىڭ ايتۋىنشا، بۇگىنگى كۇنى ەلىمىزدە شامامەن 38 ميلليوننان استام بانكتىك شوت بۇعاتتالىپ وتىر.
«مەن ازاماتتاردىڭ ەڭ تومەنگى تابىسىن قورعاۋ جانە ءوندىرىپ الۋشىلار مەن بورىشكەرلەر قۇقىقتارىنىڭ تەڭگەرىمدى ساقتالۋىن قامتاماسىز ەتۋ ماقساتىندا زاڭ جوباسىنا قورعالعان الەۋمەتتىك شوت نەمەسە ارنايى بانكتىك شوت اشۋ تۋرالى ۇسىنىس بەردىم. مۇنداي شوتقا ايىنا 300 مىڭ تەڭگەگە دەيىنگى سوماداعى تۇسىمدەرگە ءوندىرىپ الۋ شارالارى قولدانىلمايدى. ءسىز ازاماتتارعا ايىنا 300 مىڭ تەڭگەگە دەيىنگى سومادا ءوندىرىپ الۋدان قورعالاتىن الەۋمەتتىك شوت ەنگىزۋ باستاماسىنا قالاي قارايسىز جانە شوتى بۇعاتتالعان ازاماتتار ءۇشىن ءسىزدىڭ اگەنتتىك قانداي تاسىلدەر قاراستىرۋدا؟»—دەدى ول.
ءوز جاۋابىندا قارجى نارىعىن رەتتەۋ جانە دامىتۋ اگەنتتىگىنىڭ ء تورايىمى وتكەن جىلى وسى زاڭ قابىلدانعان كەزدە تابىسى تومەن ازاماتتاردى قورعاۋعا باعىتتالعان نورمالار كەڭەيتىلگەنىن ايتتى. اتاپ ايتقاندا، قارجى ۇيىمدارىنا بىرقاتار الەۋمەتتىك تولەمدەردى ءوندىرىپ الۋعا تىيىم سالىنعان.
«بلوكتالعان شوتتار بويىنشا ءسىز كەلتىرگەن دەرەكتەرگە قاتىستى ءبىز مۇمكىن بولاتىن شارالاردى قاراستىرۋعا دايىنبىز. الەۋمەتتىك وسال ازاماتتارمەن جۇمىس ىستەۋ كەزىندە بانكتەر ءاربىر شوت بويىنشا جەكە ءتاسىل قولدانادى. ءبىزدىڭ نەگىزگى ماقساتىمىز — ولارعا جان-جاقتى كومەك كورسەتۋ. سونداي-اق قابىلداۋعا بولاتىن قوسىمشا شارالاردى دا قاراستىرۋعا دايىنبىز»، — دەدى اگەنتتىك ءتورايىمى.
سونىمەن قاتار قارجى رەتتەۋشىسىنىڭ باسشىسى بۇل ماسەلەنى زاڭ جوباسىن ءارى قاراي پىسىقتاۋ بارىسىندا قاراستىرۋعا ۋادە بەردى.
