«ارسەلورميتتال تەمىرتاۋ» كومپانياسىنىڭ بارلىق شوتتارى بۇعاتتالعان. بۇل تۋرالى كومپانيانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
ال كاسىپورىندارىندا جۇمىس ىستەيتىن كەنشىلەر كومپانيا شوتتارىنىڭ بۇعاتتالۋىنا بايلانىستى "زەينەتاقى اۋدارىمدارىنسىز، سونداي-اق مەديتسينالىق كومەك سالىمىنسىز قالامىز با" دەپ قاۋىپتەنەدى.
وڭىردەگى Ekaraganda.kz باسىلىمى 4 جەلتوقساندا "كوستەنكو شاحتاسىندا بولعان تراگەديادان امان قالعان كەنشىلەر مەديتسينالىق كومەك پەن تولەمدەرسىز قالامىز با" دەپ قاۋىپتەنەتىنىن جازدى. جاقىندا اۋرۋحانادان ەمدەلىپ شىققان 28 كەنشى قازان ايى ءۇشىن وزدەرىنىڭ اتىنا مىندەتتى مەديتسينالىق ساقتاندىرۋ قورىنا جارنا اۋدارىلماعانىن بىلگەن.
"سويتسە بۇل ماسەلە كوستەنكو اتىنداعى شاحتادا اپاتتان كەيىن ءتىرى قالعان كەنشىلەرگە عانا قاتىستى بولماي شىقتى. "ارسەلورميتتال تەمىرتاۋ" كومپانياسىنىڭ بارلىق قىزمەتكەرىنە قازان ايىنا الەۋمەتتىك تولەمدەر اۋدارىلماپتى. بۇگىن كومپانيا شوتتارىنىڭ بۇعاتتالعانى بەلگىلى بولدى", - دەپ جازادى Ekaraganda.kz.
جۇمىس بەرۋشى مامسق -عا اقشا اۋدارۋدى توقتاتقاندىقتان، العان جاراقاتتارىنان ايىققان كەنشىلەر تەگىن مەديتسينالىق كومەكسىز قالۋى مۇمكىن. ەمحانالار جارنا تولەمەگەندىكتەن ولاردى ەمدەۋدەن باس تارتۋى مۇمكىن. سونداي-اق، قاراعاندى وبلىسىنىڭ كەنشىلەرى بجزق-عا جارنا اۋدارىلماعاندىعىنا شاعىمدانۋدا. تولەمدەر قاراشا ايىنىڭ سوڭىندا ءتۇسۋى كەرەك بولاتىن، بىراق جەلتوقساننىڭ باسى بولسا دا جۇمىس بەرۋشى ەشقانداي الەۋمەتتىك اۋدارىمدار جاساماعانى بەلگىلى بولدى.
مىندەتتى مەديتسينالىق ساقتاندىرۋ قورىنىڭ قاراعاندىداعى فيليالى مەكەمە وكىلدەرى وبلىس ورتالىعىندا كومىر دەپارتامەنتىمەن، كاسىپوداقپەن، زاڭگەرلەرمەن جانە امت ەسەپشىلەرىمەن كەزدەسۋ وتكىزگەگەنىن حابارلادى. قوردىڭ مالىمەتىنشە، ءبىر ايعا تولەم جاسالماعان.
"ارسەلورميتتال تەمىرتاۋ" الەۋمەتتىك تولەمدەردىڭ دەر ۋاقىتىندا اۋدارىلماۋىنا كومپانيانىڭ بارلىق شوتتارىنىڭ بۇعاتتالۋى سەبەپ ەكەنىن ايتتى.
"BSR-مەن اراداعى زاڭدى داۋعا بايلانىستى بانكتىك شوتتاردىڭ بۇعاتتالعانىن حابارلايمىز. ءبىزدىڭ زاڭ جانە قارجى قىزمەتتەرى جاعدايدى مۇمكىندىگىنشە تەزىرەك شەشۋ جانە شوتتاردى بۇعاتتان بوساتۋ ءۇشىن قۇزىرەتتى ورگاندارمەن جۇمىس ىستەپ جاتىر. شوتتى بۇعاتتان بوساتۋدا ماسمق جانە زەينەتاقى جارنالارىن تولەۋ ءبىرىنشى كەزەكتەگى مىندەت بولىپ تابىلادى. قازىرگى قالىپتاسقان جاعداي ءۇشىن كەشىرىم سۇرايمىز", دەلىنگەن "ارسەلورميتتال تەمىرتاۋ" مالىمدەمەسىندە.
كومىر وندىرۋشىلەر كاسىپوداعى شاحتا قىزمەتكەرلەرى اراسىندا ءتۇسىندىرۋ جۇمىستارىن جۇرگىزدى. كومپانيا شوتتارىنىڭ بۇعاتتان بوساتۋ جانە قاجەتتى تولەمدەردى جۇزەگە اسىرۋ بويىنشا ءتيىستى كەلىسسوزدەر جۇرگىزىلۋدە.
ايتا كەتسەك، بۇعان دەيىن يندۋستريا جانە ساۋدا مينيسترلىگى قر ۇكىمەتى مەن "ارسەلورميتتال تەمىرتاۋ" اق اراسىنداعى مامىلە سوڭعى ساتىعا جاقىنداپ كەلە جاتقانىن ايتقان بولاتىن. كومپانيانىڭ اكتيۆتەرى كوستەنكو اتىنداعى شاحتاداعى قازان ايىندا بولعان قايعىلى وقيعادان كەيىن باسقا ينۆەستورعا بەرىلەدى.
