20 قىركۇيەك كۇنى ءال-فارابي اتىنداعى قازاق ۇلتتىق ۋنيۆەرسيتەتىندە فيلولوگيا فاكۋلتەتىن 1974 جىلى اياقتاعان تۇلەكتەر كەزدەسۋى ءوتتى.
ءبىلىمنىڭ قارا شاڭىراعى قازاق ۇلتتىق ۋنيۆەرسيتەتىنىڭ 90 جىلدىعىمەن قاتار كەلگەن 50 جىلدىق مەرەيتويعا ەلىمىزدىڭ ءار ايماعىنان 30-عا جۋىق تۇلەك كەلىپ قاتىستى. الدىمەن وقۋ عيماراتىمەن تانىسقاننان كەيىن، ەندى عانا ۇلكەن ومىرگە قادام باسقان 1-كۋرس ستۋدەنتتەرىنە اقىل-كەڭەستەرىن ايتىپ، جىلى لەبىزدەرىمەن ءبولىستى. كەزدەسۋدى جوعارى وقۋ ورنى رەكتورىنىڭ كەڭەسشىسى وتەگەن ورالباەۆ:
«ءبىز قازاقستاننىڭ تۇكپىر-تۇكپىرىنەن كەلىپ، دوس بولدىق. وزدەرىڭدى كورىپ جاستىق شاعىمىزدى بىرگە وتكىزگەن كۇندەرىمىز قايتا ورالعانداي بولىپ وتىر. وسى كۇنگە دەيىن، ءبىر-ءبىرىمىزدى ۇمىتپاي، ارالاسىپ كەلە جاتىرمىز. 1969 جىلى باستالعان دوستىقتىڭ تۋىن قۇلاتپاي، ءالى جوعارى ۇستاپ ءجۇرمىز»، – دەپ باستادى.
ءىس-شارادا پەداگوگيكا عىلىمدارىنىڭ دوكتورى، پروفەسسور تۇرسىنبەك بايمولداەۆ، قازاقستان جازۋشىلار وداعىنىڭ مۇشەسى، پروفەسسور انارباي بۇلدىباەۆ، «قۇرمەت گراموتاسىنىڭ» يەگەرى سەرىك سۇلتانعاليەۆ، فيلولوگيا عىلىمدارىنىڭ دوكتورى، سىنشى دانداي ىسقاقۇلى سىندى اعا-بۋىن وكىلدەرى ءسوز سويلەپ، قۇتتىقتاۋلارىن جەتكىزدى.
فيلولوگيا فاكۋلتەتىنىڭ تۇلەكتەرىن قۇتتىقتاپ، قازۇۋ-دىڭ جۋرناليستيكا فاكۋلتەتىن 1974 جىلى اياقتاعان جانبولات اۋپباەۆ تا كەزدەسۋ بارىسىندا ءسوز سويلەدى. ول ءوز سوزىندە:
«ءبىزدىڭ تۇسىمىزدا مەملەكەتتىك مارەبەسىن العان ءۇش ۋنيۆەرسيتەت بولسا، سونىڭ ەڭ العاشقىسى وسى قازۇۋ بولدى. ءبىز سوعان وقۋعا تۇستىك، سول ءۇشىن ءبىز باقىتتىمىز. ەكىنشى باقىتىمىز – ون ەكى وبلىستىڭ وكىلدەرىمەن بىرگە وقىدىق. ءۇشىنشى باقىتىمىز – ءوزىمىز وقيتىن پاندەردىڭ اۆتورلارىمەن، ۇلكەن عۇلامالاردىڭ كوزىن كورگەن عالىمداردىڭ وزىنەن ساباق العانىمىز. فيلفاك پەن جۋرفاك تەل فاكۋلتەت. ەگەر قازۇۋ-دا سول كەزدە 18 فاكۋلتەت بولسا، ەكەۋى ەرەكشە ءبىر-بىرىمەن وتە جاقىن ارالاسىپ كەتكەن ەدى»، – دەدى.
كەزدەسۋ سوڭىندا ءسوز العان پروفەسسور دانداي ىسقاقۇلى فيلولوگيا ماماندىعىنىڭ ەرەكشەلىگىن جەتكىزە كەلىپ:
“ اسىرەسە، «ءسوز – ەڭ ءبىر قۋاتتى قارۋ»، «ءسوز» ىسكە اينالادى. ءار ۇلتتىڭ دا ەرەكشەلىگى سوزىنەن كورىنەدى. ال ۇستاز بولسا ۇلتتىڭ بولاشاعىن جاسايتىن ەڭ ۇلى تۇلعا. مىسالى، يزرايلدە 8 ملن. ەۆرەي بار. ونىڭ 3 ملن. 500 مىڭى ارابتار ەكەن. قازىر وسى ەكى ەلدىڭ اراسىندا جاعداي ۋشىعىپ وتىر. وسى تۇستا ەڭ باستىسى سەنىڭ ءتىلىڭنىڭ مىقتى بولعانى ماڭىزدى بولىپ وتىر. سوندا عانا كەز كەلگەن ەلدىڭ رۋحى مىقتى بولادى. قازىر ادام كاپيتالى ۇلتىڭ ەرەكشە بولسا عانا العا شىعادى. سوندىقتان بىزگە قازىر قازاق ءتىلىن كۇشەيتۋ كەرەك. قازاق ءتىلىنىڭ تۋىن كوتەرەتىن بىزدەر، ياعني ءتىل ماماندارى بولعاندىقتان ارتىلار جۇك كوپ ەكەندىگىن ۇمىتپايىق”، – دەدى.
تۇلەكتەر كەزدەسۋىندە دامەگۇل باياليەۆا، جانار ابدىشەۆا، مۇرات تولەنديەۆ، گۇلشارا الكەنوۆا، باقىت نازىكەەۆا، مايرا تولەباەۆالار ءسوز سويلەپ، تىلەكتەرىن ءبىلدىردى.
ءىس-شاراعا قاتىسقان ءبىرىنشى كۋرس ستۋدەنتتەرى وقۋ ورداسىنا ارنالعان ولەڭدەر وقىپ، وتانسۇيگىشتىكتى ناسيحاتتايتىن اندەر ايتىپ تۇلەكتەرگە ونەرلەرىن كورسەتتى. كەزدەسۋ بارىسىندا جينالعان تۇلەكتەر تەك ەستەلىكتەرىمەن ءبولىسىپ قانا قويماي، ءال-فارابي اتىنداعى قازۇۋ-دىڭ الداعى دامۋ جوسپارىمەن دە تانىس بولدى. 27 مىڭعا جۋىق ستۋدەنت ءبىلىم الىپ جاتقان وقۋ ورداسىندا 600 عىلىم دوكتورى، 3 مىڭعا جۋىق مۇعالىم، 6 مىڭنان استام قىزمەتكەر جۇمىس ىستەيدى. قاسيەتتى قارا شاڭىراق ءاردايىم ءوز تۇلەكتەرىن اسىعا كۇتەدى.
