Qazaq ūlttyq qyzdar pedagogikalyq universitetıne memleket tarapynan jaŋa ǧimarat zaŋdy türde paidalanuǧa berıldı. Būl turaly universitet rektorynyŋ mındetın atqaruşy Erkın Düsıpov BAQ ökılderımen kezdesude aitty.
2024 jyldyŋ 18 qyrküiegınde Qazaq ūlttyq qyzdar pedagogikalyq universitetınde BAQ ökılderıne arnalǧan baspasöz tury öttı. Jurnalisterge joǧary oqu ornynyŋ ǧimaratynda tur ötkızılıp, zerthanalar, mūrajai, art galereia tanystyryldy. Bas korpustan keiın universitettıŋ jaŋa korpusyna tur jasaldy. 80 jyldyq tarihy bar Qazaq ūlttyq qyzdar pedagogikalyq universitetınıŋ 1986 jyldan berı alǧaş ret Almaty qalasynyŋ ortalyǧynda oqu ǧimaratyna ie boldy. Memleketten berılgen oqu ǧimaratynyŋ audany 12 000 şarşy metrden asady.
Baspasöz tury barysynda jurnalisterge QyzPU rektorynyŋ mındetın atqaruşy Erkın Düsıpov oqu ornynyŋ jetıstıkterı men damu prespektivalary turaly aqparat berdı. Prorektor qonaqtardy zamanaui bılım beru alaŋdarymen, sondai-aq universitette bılım beru prosesıne engızılıp jatqan zamanaui ädıstermen tanystyryp, alǧa qoiǧan josparlarmen bölıstı.
«80 jyldyq mereitoi qarsaŋynda Qazaq ūlttyq qyzdar pedagogikalyq universitetıne jaŋa oqu korpusynyŋ berıluı QyzPU ūjymy üşın tarihi oqiǧa boldy. Jaŋa ǧimarat universitetke şılde aiynan bastap zaŋdy türde paidalanuǧa berıldı. Qazırgı taŋda üşınşı, törtınşı, altynşy qabattarda horeografiia, pedagogika, psihologiia, tarih, qazaq tılı men ädebietı mamandyqtary boiynşa oqu jürıp jatyr. Bolaşaqta magistranttar men doktornattardy da osy ǧimaratta oqytudy josparlap otyrmyz. Bılım ordasynda jalpy sany 12005 student bar. Biyl 1 kursqa 5000-ǧa juyq studenttı qabyldadyq. Bılım aluşylarǧa jaǧdai jasau – bızdıŋ mındetımız», – dedı prorektor.
Onyŋ aituynşa, aldaǧy uaqytta jaŋa ǧimaratqa taǧy da zamanaui qūral-jabdyqtar alynady.
Ūqsas jaŋalyqtar
