ەكولوگيا جانە تابيعي رەسۋرستار ءمينيسترى ەرلان نىسانباەۆ قازاقستاندا جولبارىستاردى جەرسىندىرۋ جوسپارلارى تۋرالى ايتتى، - دەپ حابارلايدى "ادىرنا" ۇلتتىق پورتالى.
ول 2015 جىلى دۇنيەجۇزىلىك جابايى تابيعات قورىمەن رەينترودۋكتسيالاۋ تۋرالى ءتيىستى قۇجاتقا قول قويىلعانىن ەسكە سالدى.
«ول – تۇران جولبارىسى. ىلە وزەنىنىڭ جاعاسىنداعى ورماندا جانە بالقاش وزەنىنە قۇياتىن جەردەگى قامىس وسەتىن القاپتا تۇران جولبارىسى بولعان. سوڭعى جولبارىس سول وڭىردە 1948 جىلى مەكەندەگەن. سوندىقتان ءبىز كەر تاعىنى (جابايى جىلقى – رەد.) الىپ كەلىپ، ونداعى پوپۋلياتسيانى قالپىنا كەلتىرەمىز دەگەن ۇلكەن باعدارلامامىز بار. 2026 جىلى ول 40 باس بولادى. ەندى جولبارىستىڭ پوپۋلياتسياسىن قالپىنا كەلتىرۋ بويىنشا 2024 جىلعى قىركۇيەكتىڭ سوڭىنا دەيىن نيدەرلاندتان ەكى جولبارىس الىپ كەلەمىز. بۇل تۇران جولبارىسى تۇقىمداس امۋر جولبارىسى. سەبەبى وسى ەكى جولبارىس قانا سۋىققا ءتوزىمدى. قالعان جولبارىستىڭ ءبارى جىلى جەردە ءومىر سۇرەدى. سوندىقتان كەلەسى جىلى رەسەيدەن تاعى ءتورت جولبارىستى اكەلەمىز. وسىلايشا بىزدە بولعان جولبارىستىڭ پوپۋلياتسياسىن قالپىنا كەلتىرۋ ماسەلەسىن شەشۋگە ارنالعان باعدارلاما بار، - دەدى ەكولوگيا ءمينيسترى ەرلان نىسانباەۆ.
ونىڭ ايتۋىنشا، بۇل جولبارىستار حايۋاناتتار باعىندا ۇستالاتىن بولادى.
«ولار شىعارىلمايدى، بىراق پايدا بولعان تولدەر تابيعات جاعدايىنا قاراي جەرسىندىرىلەتىن بولادى»، - دەپ قوستى مينيستر.
ەسكە سالا كەتەكيىك، 2021 جىلى قازاقستان پرەزيدەنتى قاسىم-جومارت توقاەۆ جولبارىستى قايتا جەرسىندىرۋ تۋرالى ايتقان ەدى.
