ايداعانى قوس سيىر، ىسقىرىعى جەر جارار!

610

جاسىمىز بار، جاسامىسىمىز بار، سيىر، سيىر دەپ سايراعالى بىرنەشە كۇننىڭ ءجۇزى بولدى. 30 جىل ەل باسقارعان ابىز اقساقالدىڭ اقىلىن كەلەمەجدەۋ كىمگە كەرەك؟ بالا باۋىر ەتىڭ، ونى اسىراپ باعۋ، ءوسىرىپ جەتىلدىرۋ وتاعاسىنىڭ تىكەلەي مىندەتى دەپ بىلەمىن! جاقسىلىق جاسايمىز دەپ مەملەكەت ءار بالاعا 21 مىڭ تەڭگەدەن بەرىپ جاتىر. ونى كىم قالاي باعالاۋدا؟ ماسەلەن، تانىس-تامىرىمىز  التى بالانى اسىراسا دا، 21 مىڭ تەڭگە بەلگىلەنگەن كۇننەن باستاپ ايەلىنە ءبىز وسى كۇنگە دەيىن وسى تيىن-تەبەنسىز ءومىر سۇردىك، وتباسىن باعۋ مەنىڭ مىندەتىم. اقشانى ءار اي سايىن الماي جينايىق، ول اقشانى جوق دەپ سانايىق دەپ كەلىسەدى. كۇنى كەشە جيىلعان قارجىعا جەر العانىن ايتىپ قۋانۋدا. ەندى تاعى ءۇي سالۋعا ارەكەتتەنەمىز دەپ بەرىك شەشىم قابىلداپ وتىر.  قالاي قۋانبايسىڭ؟ ال، ءبىر كورشىم بار ون بالانىڭ اكەسى،(246 000) ، ايەلى 11-بالاعا اياعى اۋىر. 21 مىڭ تەڭگەگە دەيىن تىرشىلىك ىستەپ ەڭبەكتەنەتىن. قازىر ونى دا ۇمىتقان.  ءتىپتى وتكەندە ەستىسەم تۇتىنعان ەلەكتر ەنەرگياسىنا تولەمەي كەلىپتى. كوپ بالالى اكەمىن دەپ. ال، نە دەيسىزدەر؟ وسى ماسىلدىقتى كورگەن بالالارى كىم بولادى؟ باياعىدا اۋىلدا جاعدايى قانشا تومەن بولسادا، تىكەلەي اپارىپ كومەك كورسەتسەڭ ارلانىپ «بىزدە ءبارى بار، اۋرە بولماڭىزدار» دەپ وتىرۋشى ەدى. قازىر ادامنان ار كەتتى مە؟ سيىر اڭگىمەسىنەن شىعادى. كەزىندە وداق تاراعاندا 16 بالانىڭ اتا-اناسى، كولحوز قىزمەتكەرىنە جايىلىمدىق جەر مەن ون قوي بەرەدى. باسقالارى 100-150 قويدان، 15-20 سيىردان الىپ جاتقان كەز. سول مالدارىن "جيگۋلي" مەن "موسكۆيچكە" ايىرباستاپ ۋاقىتشا قىزىق كورىپ جاتقان قاتارلاستارى. ال، اعامىز بەن تاتەمىز ون قويدى العا سالىپ تاۋدان بەرگەن جايىلىمدىق جەرگە جول تارتقان. ال، قازىر 4 مىڭداي قوي، ءۇش تابىن سيىر، 6 ءۇيىر جىلقى. مىنە، ەڭبەك! تىرناق قيمىلداتقان ادامعا تىرشىلىك بار! كەلتىرە بەرسەك مىسال كوپ. ەڭبەكتەنەيىك، ەرىنبەي.

 

باقتيار مىرزاحانۇلى

"ادىرنا" ۇلتتىق پورتالى

پىكىرلەر