شىمكەنتتە تۇرمەدەگى تۇتقىن قايتىس بولدى، دەپ حابارلايدى “ادىرنا” ۇلتتىق پورتالى.
37 جاستاعى جازاسىن وتەۋشى ازاماتتىڭ تۋىستارى ونىڭ وزدىگىنەن قايتىس بولعانىنا سەنبەيتىنىن ايتتى. ادىلدىك ىزدەگەندەر مارقۇمدى مەكەمە قىزمەتكەرلەرىنىڭ ۇرىپ ولتىرگەنىن ايتادى.
ال قۇقىق قورعاۋ ورگاندارىنىڭ ءوزى ونىڭ ۇزاققا سوزىلعان سىرقاتتان قايتىس بولعانىن ايتادى.
كۇزەت مەكەمەسى باسشىسىنىڭ دەرەگىنشە، بوپسالاۋ فاكتىسى بويىنشا 3,5 جىلعا سوتتالعان ازامات تۇرمەگە تۇسكەن ساتتەن باستاپ اسقازان اۋرۋىمەن اۋىرعان. 5 رەت مەديتسينالىق كومەككە جۇگىنىپ، ارتىنشا سوڭعى رەت 3 قىركۇيەكتە اۋرۋحاناعا ءتۇسىپ، كەيىن قايتىس بولعانىن حابارلادى.
مارقۇمنىڭ ارتىندا ايەلى مەن ءۇش بالاسى قالدى.
"قازىر تەرگەۋ ءجۇرىپ جاتىر. قىلمىستىق ءىس قوزعالىپ، ءتيىستى ورگانداردا تەرگەلەدى. ارينە، مارقۇمنىڭ تۋىستارى بىزگە سەنبەيدى. بالكىم، ولار ونى ۇردى دەپ ويلايتىن شىعار. تەكسەرۋ قورىتىندىسى تۋىستارىنا حابارلانادى", - دەيدى قىلمىستىق اتقارۋ جۇيەسىنىڭ شىمكەنت قالاسى مەن تۇركىستان وبلىسى بويىنشا دەپارتامەنتىنىڭ № 54 مەكەمەسىنىڭ باسشىسى سەرىكباي دۇيسەنوۆ.
