اقش-تىڭ بىرنەشە شتاتىندا حەللوۋين مەرەكەسى كەزىندە بولعان اتىستار سالدارىنان 24 ادام قازا تاۋىپ، 90-نان استام ادام جاراقات الدى، دەپ حابارلايدى "ادىرنا" ۇلتتىق پورتالى The New York Times باسىلىمىنا سىلتەپ.
دەلاۆەر شتاتىنىڭ گۋبەرناتورى مەتت مەيەر قارۋلى زورلىق-زومبىلىقتى قالىپتى جاعداي رەتىندە قابىلداۋعا بولمايتىنىن ايتتى.
«بۇل – قالىپتى جاعداي ەمەس. ءبىز قارۋلى زورلىق-زومبىلىقتى ەشقاشان ءومىرىمىزدىڭ اجىراماس بولىگى رەتىندە قابىلداماۋىمىز كەرەك»، – دەدى ول.
وقيعالاردىڭ ءبىرى تەحاس شتاتىنداعى داللاس قالاسىندا بولعان. Deep Ellum اۋدانىندا ءبىر جارىم ساعاتقا جەتپەيتىن ۋاقىت ىشىندە ءۇش رەت اتىس بولىپ، كەمىندە ءتورت ادام قازا تاپتى. تاعى 15 ادام جاراقات الدى. فلوريدا شتاتىنىڭ دجەكسونۆيلل قالاسىندا بولعان ەكى بولەك اتىس سالدارىنان ەكى ادام كوز جۇمىپ، 11 ادام جاراقاتتاندى. ال كاليفورنيا شتاتىندا Spirit Halloween كوستيۋمدەر دۇكەنىندە وق اتىلىپ، جۇكتى ايەل قازا تاپتى. تاعى التى ادام جاراقات الدى.
دەلاۆەر شتاتىندا ءبىر ساعاتتان استام ۋاقىت ىشىندە ەكى جاپپاي اتىس تىركەلگەن. ەللەندەيل قالاسىندا 17 جاستاعى قىز قازا تاۋىپ، سەگىز ادام جاراقات السا، نيۋارك قالاسىندا التى ادام زارداپ شەككەن.
بۇدان بولەك، ميچيگان، كانزاس، تەحاس، يللينويس، ينديانا، اركانزاس جانە ميسسيسيپي شتاتتارىندا دا اتىس وقيعالارى بولعان.
سونداي-اق 1 قاراشادا الاباما شتاتىنىڭ بيرمينگەم قالاسىنداعى Legion Field ستاديونى ماڭىندا اتىس بولىپ، ءبىر ادام قازا تاپتى. تاعى سەگىز ادام جاراقات الدى.
وسى وقيعادان كەيىن قالالىق پوليتسيا دەپارتامەنتى Magic City Classic سپورتتىق جارىسىنىڭ 85-ءشى جىل سايىنعى ءىس-شارالارىنا قاتىستى بارلىق شارانى ۋاقىتشا توقتاتقان. قۇقىق قورعاۋ ورگاندارى تۇرعىندارعا ستاديون ماڭىنا بارماۋدى ەسكەرتكەن.
قازىر بيرمينگەمدەگى اتىستىڭ ءمان-جايى بەلگىسىز.
