پرەمەر-مينيستر ولجاس بەكتەنوۆ مۇنايلى اۋدانىنىنىڭ بەسشوقى اۋىلىندا بالالاردىڭ ۋلانۋىنا بايلانىستى دەنساۋلىق ساقتاۋ، وقۋ-اعارتۋ مينيسترلەرى مەن ماڭعىستاۋ وبلىسى اكىمىنىڭ ەسەپتەرىن تىڭدادى. بۇل تۋرالى بۇگىن، 9 قىركۇيەكتە ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
رەسمي مالىمەتتەرگە سۇيەنسەك، بۇگىنگى تاڭدا 460 بالا دارىگەرلەردىڭ باقىلاۋىندا. ونىڭ 83-ءى اۋرۋحاناعا جاتقىزىلدى. زارداپ شەككەندەردىڭ بارلىعى، ونىڭ ىشىندە جانساقتاۋ بولىمىندەگى 2 بالانىڭ جاعدايى تۇراقتى. دەنساۋلىعىنىڭ جاقسارۋىنا بايلانىستى رەانيماتسيادا جاتقان ەكى بالا جالپى بولىمشەگە اۋىستىرىلدى.
«قازىرگى ۋاقىتتا اۋرۋحاناعا ۋلانۋ بەلگىلەرىمەن تۇسكەن بالالاردىڭ بارلىعىنا تولىق كولەمدە قاجەتتى مەديتسينالىق كومەك، سونىڭ ىشىندە پسيحولوگيالىق كومەك كورسەتىلۋدە. وقيعا ورنىندا وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ وكىلدەرى جۇمىس ىستەپ جاتىر. زارداپ شەككەندەرگە جانە ولاردىڭ وتباسىلارىنا قولداۋ شارالارىن كورسەتۋ بويىنشا جۇمىستار جۇرگىزىلۋدە. تاۋلىك بويى شتاب جۇمىس ىستەيدى»،—دەپ جازدى ۇكىمەتتىڭ ءباسپاسوز قىزمەتى.
اۋرۋ وشاعىن وقشاۋلاۋ جانە جويۋ شارالارىن كۇشەيتۋ ءۇشىن وڭىرگە «قوعامدىق دەنساۋلىق ساقتاۋ ۇلتتىق ورتالىعى» شجق رمك «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالىنىڭ ماماندارى جىبەرىلدى.
ۇكىمەت باسشىسىنىڭ تاپسىرماسى بويىنشا ءبىر اي ىشىندە رەسپۋبليكاداعى بارلىق مەكتەپتەردىڭ اسحانالارىندا سانيتاريالىق-ەپيدەميولوگيالىق تالاپتاردىڭ ساقتالۋىنا مونيتورينگ جۇرگىزىلەدى. ول مەكتەپتەگى تاماقتانۋدىڭ قاۋىپسىزدىگىن قامتاماسىز ەتۋ جانە مۇنداي جاعدايلاردىڭ قايتالانۋىنا جول بەرمەۋ شارالارىن كۇشەيتۋگە باعىتتالعان.
ايتا كەتەيىك، № 8 مەكتەپتە تەرگەۋ جۇمىستارى جۇرگىزىلىپ جاتىر. كىنالىلەر جاۋاپقا تارتىلادى.
