گروزنىي: "ەرتىستى" اپاتقا ۇشىراتقان - باسشىلىق"

195

ول پاۆلوداردا ۇزاق جۇمىس ىستەمەدى، بىراق ءوزى تۋرالى كوپتەگەن جاقسى ەستەلىكتەر قالدىردى. ۋكراينالىق جاتتىقتىرۋشى ۆياچەسلاۆ گروزنىي «سپورتينفورمعا» بەرگەن سۇحباتىندا «ەرتىستە» كىمنىڭ كىناسى بويىنشا جۇمىسىن جالعاستىرمادى، بوكسقا نەگە بارمايدى جانە فۋتبول تۋرالى كىتاپتى كىمگە جىبەرۋگە دايىن ەكەنىن ايتتى.
ءبىز قوڭىراۋ شالعاندا بولگاريادا دەمالىستا ءجۇر ەكەن. بۇل ەلدە ول بوس ۋاقىتىن وتكىزۋدى ۇناتادى. "لەۆسكيدە" جۇمىس ىستەگەن كەزدەن باستاپ  ادەت بولىپ كەتكەن. ەندى ونىڭ بوس ۋاقىتى كوپ. سوندىقتان ۆياچەسلاۆ ۆيكتوروۆيچ سۇحباتتاسۋعا وڭاي كەلىستى.

- ۆياچەسلاۆ ۆيكتوروۆيچ، ءسىز قازىرگى "ەرتىستىڭ" جاعدايىن قاداعالاپ ءجۇرسىز بە؟

- ارينە. مەن تەك «ەرتىستى» عانا ەمەس، سونىمەن بىرگە بۇرىنعى كلۋبىم «توبولدى» دا باقىلاپ ءجۇرمىن. قالاي بولعاندا دا، مەن بارشا قازاقستاندىق فۋتبولدىڭ ءيمپۋلسىن ساۋساعىمدا ۇستايمىن. نەلىكتەن؟ ماعان ءسىزدىڭ ەل، ادامدار، فۋتبولشىلار ۇنايدى. مەن نە ايتا الامىن؟ «ەرتىس» ءۇشىن بۇل وتە وكىنىشتى. پاۆلودارلىق جانكۇيەرلەر مۇنداي ماسقاراعا لايىق ەمەس ەدى. ءتىپتى ەكى جىل قاتارىنان.

- ءسىزدىڭ ويىڭىزشا، ولار ماۋسىم سوڭىندا پرەمەر-ليگاسىز قالادى ما؟

مەن سەنىمدى ەمەسپىن. ولار ۇشىپ كەتپەيدى. جەرگىلىكتى جىگىتتەر لەگيونەرلەرمەن بىرگە جينالىپ، قالعان ماتچتاردى ءتيىستى دەڭگەيدە وتكىزۋ ءۇشىن بارلىعىن جاساۋى كەرەك.تۋرنيرلىك تابليتسادا  بولىپ جاتقان جاعداي اپات. بىراق ءبارى تۇزەتىلەدى.

ديميتار ديميتروۆ

- ەسىڭىزدە بولسا، 2017 جىلى ءسىز ديميتار ديميتروۆ كەتكەننەن كەيىن كوماندانى قابىلدادىڭىز جانە ەۋروپا ليگاسىندا ويناۋ مىندەتىن ورىندادىڭىز. اكىم (باقاۋوۆ)  ءسىزدىڭ جۇمىسىڭىزعا وتە ريزا بولدى دەگەن قاۋەسەت تارادى. بىراق كەلىسىمشارت جاڭارتىلعان جوق. نەلىكتەن؟

- مەن اڭگىمەنى ترانسفەر تەرەزەسى جابىلعان ۋاقىتتا كەلگەنىمنەن باستاعىم كەلەدى. مەن بۇعان ادەيى نازار اۋدارامىن. نەگە؟ سەبەبى، قولدا بار ماتەريالمەن جۇمىس ىستەۋىم كەرەك بولدى. جىگىتتەر تۋرالى جامان ءسوز ايتقىم كەلمەيدى، ول تۋرالى ويلاماڭىز دا. بىراق مەنىڭ تالاپتارىمدى، تۇجىرىمدامامدى ءتۇسىنۋ جانە قابىلداۋ ءۇشىن ولارعا كوپ ۋاقىت قاجەت بولدى. ەگەر كوماندادا مەنىمەن بىرگە جۇمىس جاسايتىنىمدى بىلەتىن بىرنەشە جىگىت بولسا نەمەسە مەنىڭ فۋتبولعا دەگەن كوزقاراسىما سايكەس كەلەتىن ادامدارمەن بىرنەشە پوزيتسيانى كۇشەيتۋ مۇمكىندىگى بولسا، ءبارى وڭاي بولار ەدى. سوعان قاراماستان ءبىز تاپسىرمانى ورىندادىق. ەرتىس ويىنشىلارىنىڭ مىنەزدەرى مەن رۋحتارى مىقتى بولدى. ولار وسى قاسيەتتەرسىز ويناي الماس ەدى. مەنىڭ قۇرامىمدا ءسوزسىز جەتەكشىلەر - داۆيد لوريا، ءپىرالى |اليەۆ جانە كارلوس فونسەكا بولدى. ولاردىڭ ساتتىلىكتەگى ءرولى وتە زور، ونى باعالاۋ مۇمكىن ەمەس. ولاردىڭ اينالاسىندا باسقالار جينالدى. كوشباسشىلار ءبىزدى العا شىعاردى، مىنەز بەن تاباندىلىق تانىتتى. ءبارى بىردەن باستالمادى، قيىندىقتار كوپ بولدى، مەن كوپتەگەن تەوريالىق زەرتتەۋلەر جۇرگىزۋىم كەرەك بولدى. ۋاقىت وتە كەلە بارلىعى ويداعىداي ءوتتى. ءبىز كوشباسشىلارعا قارسى كەرەمەت وينادىق - قوناقتا «ورداباسى» كومانداسىن جەڭدىك. بۇل جەڭىس بىزگە دەگەن سەنىمدىلىكتى كۇشەيتتى. ۇيدە «قايراتپەن» تەڭ تۇستىك - 1: 1. ونىڭ ۇستىنە كوپ ۇپاي جيناي المادىق. سودان كەيىن استانادا ماتچ ءوتتى، ءبىز ويىن بويى جەتەكشىلىك جاسادىق، بىراق سودان كەيىن سۋديا ءبىزدىڭ قاقپامىزعا تۇسىنىكسىز پەنالتي بەلگىلەدى.

وسى ماۋسىمنىڭ قالاي اياقتالعانى ءسىزدىڭ دە ەسىڭىزدە شىعار: «اقتوبەگە» قارسى ماتچتا كاپيتانىمىزدان جانە نەگىزگى قاقپاشى داۆيدتەن جاراقاتىنا بايلانىستى ايىرىلدىق، ول شۇعىل تۇردە يتالياعا وپەراتسيا جاساتۋعا ءماجبۇر بولدى. بۇل جاراقات مەن بارلىق ويىنشىلاردى اۋىستىرۋدى قولدانعان ساتتە بولدى. ياعني، مەن رەزەرۆتىك قاقپاشىنى بوساتا المادىم. ءۇش ويىنشى دا اۋىسىپ قويعان بولاتىن. سودان كەيىن ماعان قاقپاشىلاردىڭ جاتتىقتىرۋشىسى اندرەي نەناشەۆ قورعاۋشى رۋسلان ەسىموۆتىڭ  بالا كەزىندە قاقپاشى  بولعانىن ءالى دە قاقپاعا مىقتى تۇراتىنىن ايتتى. ءسويتىپ قاقپاعا ەسىموۆ  تۇردى. ءبىزدى بىرنەشە رەت قۇتقاردى! بىراق بىزدە ءبىر ويىنشى از بولدى. «اقتوبەنى » ول كەزدە مۇحانوۆتى جاتتىقتىردىۇ  ولارعا دا ۇپاي اۋاداي قاجەت بولدى. ءبىرىنشى  گولدى قوناقتار سوقتى. ءبىز جەڭىلىپ جاتىرمىز - 0: 1. سوڭعى مينۋتتا ءبىز ەسەپتى تەڭەستىردىك! ازشىلىقتا. كوردىڭىز بە، مەن وسىنىڭ ءبارىن كەشەگىدەي ەسىمدە ساقتايمىن. ءبارى كوز الدىمدا.

سوڭعى تۋردى ەسىڭىزدە ساقتاڭىز: «شاحتەرمەن» وينايمىز، جەڭىس ءۇشىن مۇرىننان قان اقتى، ايتپەسە ەۋروپا ليگاسىن كورمەيمىز. ال سوڭعى مينۋتتا فونسەكا گول سوقتى! وسىنىڭ ءبارى مەنىڭ ەسىمدە.  كوماندانىڭ مىنەزى تەمىر ەدى!

فونسەكانىڭ سول گولى

- وسى ويىننان كەيىن ءسىز شەشىنۋ بولمەسىندە لەزگينكا بيلەدىڭىز. بۇل اياقاستى شەشىم بولدى ما؟

- جوق. بۇل ۋادە بولاتىن. مەن ارقاشان ءسوزىمدى ۇستايمىن. جازدا داۆيد لوريا ماعان: «ۆيكتوريچ، ەگەر ءسىز ەۋروپا ليگاسىنا كىرسەڭىز، ءسىز گروزنىيداعىداي بيلەيسىز بە؟» - دەدى. مەن وعان: «ءدال دالادا، ستاديوندا بىرگە ونەر كورسەتەمىز» دەپ جاۋاپ بەردىم. بىراق مەن ايتقانداي، داۆيد ول كەزدە وپەراتسيادا بولاتىن. نەگە داۆيدپەن بيلەگىم كەلدى؟ ويتكەنى، ول گرۋزين، لەزگينكانى قالاي ادەمى بيلەۋ كەرەكتىگىن بىلەدى. مەن ۋادە ەتكەندەي، شەشىنۋ بولمەسىندە بيلەدىم. جىگىتتەر ونى ۆيدەوعا ءتۇسىردى، سودان كەيىن ول جەلىگە تاراپ كەتتى. مەن ەشتەڭەگە وكىنبەيمىن، جاتتىقتىرۋشىۋادەسىن  ۇستاۋى كەرەك دەپ ويلايمىن.

- اكىم ريزا بولدى. سىزگە كەلىسىمشارتتى جاڭارتۋدى ۇسىندى، ما؟

بولات جۇمابەكۇلى باقاۋوۆ ماۋسىم اياقتالعاننان كەيىن ماعان ناتيجەگە، مەنىڭ جۇمىسىما ريزا ەكەنىن، ءارى قارايعى ىنتىماقتاستىققا قۋانىشتى بولاتىنىن ايتتى. مەن سابىرلى تۇردە ۇيگە كەتتىم.

جارناما جاتتىقتىرۋشىسى

- ال ءسىز «ەرتىس» جاڭا باپكەر ىزدەيتىنىن قايدان ءبىلدىڭىز؟

- ارىپتەسىڭىزدەن. ول ماعان قوڭىراۋ شالىپ، «ەرتىس» جارناما ارقىلى جاتتىقتىرۋشى ىزدەپ جاتقانىن بىلەتىسىز بە دەپ سۇرادى. مەن ول ازىلدەپ جاتىر دەپ ويلادىم. بىراق سودان كەيىن بۇل ءازىل ەمەس ەكەنى بەلگىلى بولدى.

- ول كەزدە نە بولدى؟

- بۇل كلۋبتىڭ بۇرىنعى ديرەكتورى جانايدار دۇيسەمباەۆتىڭ ينتريگالارى بولاتىن. مۇنىڭ ءبارى ونىڭ جاساعان ءىسى. ول ءوز جاتتىقتىرۋشىسىن اكەلگىسى كەلدى، ول ونى قالاۋى بويىنشا بۇراپ، جۇمساي الادى. بىلەسىز بە، مۇنىڭ ءبارى لاس نارسە مەن اگەنتتىڭ ءىسى. وكىنىشكە وراي، قازاقستاندا فۋتبول كلۋبتارىن باسقارۋ  دۇرىس جولعا قويىلماعان. باس باپكەر ناتيجەگە، پروتسەسكە، فۋتبولشىلاردىڭ وسۋىنە جاۋاپ بەرەدى. كەڭسەلەردىڭ مەنەدجەرلەرى كومانداعا قىزمەت كورسەتۋمەن اينالىسۋى كەرەك، ونى قامتاماسىز ەتۋى كەرەك. بىردە-ءبىر فۋتبولشى باپكەردىڭ ەركىنسىز كەلىپ، كەتپەۋى كەرەك. تەك باس باپكەردىڭ رۇقساتىمەن. بۇكىل الەم وسىلاي جۇمىس ىستەيدى. جاتتىقتىرۋشى تىكەلەي جۇمىس بەرۋشىسىنە، وعان جالاقى تولەيتىندەرگە ەسەپ بەرۋى كەرەك. مەنىڭ جاعدايىمدا بۇل اكىم. ەگەر مەن «قايراتتا» جۇمىس ىستەسەم، ونىڭ يەسى بورانباەۆ بولار ەدى. فۋتبولدى جاقسى بىلەتىن قازاقستاندىق كلۋبتاردىڭ ديرەكتورلارىنا جانە سىزگە «TheManager» كىتابىن وقۋعا كەڭەس بەرەمىن. قاجەت بولسا ولاردى جىبەرە الامىن. وندا بارلىق پروتسەستەر قالاي بولاتىندىعى سيپاتتالعان.

جانايدار دۇيسەمباەۆ

- بىراق دۇيسەمباەۆ فۋتبولدى تۇسىنبەيدى مە؟

- بوكسشىعا فۋتبولدى قالاي تۇسىنۋگە بولادى؟ قالاي ويلايسىز، مەن قازىر بوكسقا بارسام دۇرىس بولار ما؟

 

- جوق ارينە.

- نەگە ەشتەڭەنى تۇسىنبەيتىندەر فۋتبول كلۋبتارىن باسقارادى؟ جانايدار بەگايدارۇلى «ەرتىسكە» دەيىن ەشقاشان بۇل سپورتقا قاتىسى بولماعان. ال مەنى الىپ تاستادى، نە بولدى؟ بۇل قالاي بولعانىن ەسىمىزگە تۇسىرەيىك: ول اگەنتتەردىڭ الداپ-ارباۋىنىڭ اسەرىنە بوي الدىرىپ، «ەرتىسكە» يسپاندىق جەرار نۋستى اكەلدى. مەنىڭ بۇل بالاعا (نۋسقا)  قارسى ەشتەڭەم جوق. ماسەلە نۋستا ەمەس. بىراق نۋس قانشا ۋاقىت جۇمىس ىستەدى؟

- ءبىر جارىم-ەكى اي.

- بۇل نۋستىڭ ەڭبەگىنە بارلىق جاۋاپ. جىگىتتىڭ كوپ جۇمىس تاجىريبەسى بولعان جوق. ول تالداۋشى (اناليتيك) بولدى. ال دۇيسەمباەۆ اقىرى جۇمىستان بوساتىلدى. بىراق كەش بولدى، ماۋسىم قىزۋ ءجۇرىپ جاتتى، كوماندا ناتيجە بەرمەدى، يسپاندىقتان كەيىن كومەكشى بولعان  دميتري كۋزنەتسوۆ تا كوماندانى  تارتا المادى.بۇنىڭ اقىرى قايدا اكەلدى؟ ولار ديميتار ديميتروۆتى قايتاردى. بىراق، بىلىق-شىلىقتىڭ كوپتىگىنەن،  اۋەسقوي مەنەدجەرلەردىڭ بۇلدىرگەن جۇمىستارىنىڭ كەسىرىنەن  ديميتروۆقا وتە قيىن بولدى. ول كوماندانى جەڭىلىستەن قۇتقاردى. «ەرتىسكە» قاتىستى بۇنى جەتىستىك دەپ ايتۋعا بولمايدى. اۋەسقويلاردىڭ ارقاسىندا ماۋسىم ءساتسىز بولدى.

تىڭداڭىز، مەن ماسكەۋدىڭ «سپارتاكتا»، بولگاريالىق "لەۆسكيدە", "دينامو" تبيليسيدە جۇمىس ىستەدىم، ۋكراينانىڭ "دنەپر" سياقتى كوماندالارىن جاتتىقتىردىم، مەن ۋكراينانىڭ ەڭ ۇزدىك جاتتىقتىرۋشىسى دەپ تانىلدىم، مەن ۋكراينانىڭ قۇرمەتتى جاتتىقتىرۋشىسىمىن. مەندە ۇلكەن تاجىريبە بار. مەن بارلىق باسشىلاردى كوردىم. بىراق «ەرتىستەگى» سياقتى جاعداي مەندە ەشقاشان بولعان ەمەس.

- سىزدىڭشە، ديميتروۆ بيىل نەگە ناتيجە كورسەتە المادى؟

- ماعان تۇسىنىك بەرۋ قيىن، سەبەبىن بىلمەيمىن. سوندىقتان مەنىڭ ءوز تاراپىمنان مۇنى تالقىلاۋ دۇرىس بولماس ەدى. مەن ونىمەن بولگاريادا كەزدەسىپ، سويلەسەمىن دەپ ۇمىتتەنەمىن. مەن ءدال قازىر دەمالىستامىن. بىراق ءبىر نارسەنى ناقتى ايتا الامىن: ديميتروۆ - بىلىكتى مامان، ەگەر ول وعان ەشكىم كەدەرگى جاساماس، ناتيجە بەرۋدى بىلەدى. ونىڭ كلۋبتان قالاي شىعارىلعانىنا قاراپ، وعان جۇمىس ىستەتپەگەن دەپ ايتا الامىن. سونىمەن، كوماندادا، كلۋبتا بىرلىك بولمادى. ەگەر بۇل بولماسا، وندا ناتيجە دە بولمايدى. مەنىڭ ويىمشا، باسشىلىق وزدەرىنىڭ مۇددەلەرىن جاتتىقتىرۋشى مەن كوماندادان جوعارى قويادى. فۋتبولدى جاڭادان ويلاپ تابۋ مۇمكىن ەمەس. بارلىق زاڭدار جازىلعان. تەك ولاردى ۇستانۋ كەرەك.

«ولار مەنى الدادى»

-باقاۋوۆ ءسىزدى قالدىرعىسى كەلدى دەپ ايتىپ وتىرسىز. بىراق، دۇيسەمباەۆ نەلىكتەن جاڭا باپكەر ىزدەي باستادى؟

- ولار مەنى الدادى دەپ ويلايمىن، ولار مەنى باسقا كلۋبپەن كەلىسكەنمىن دەدى.  اكىمگە بىرەۋلەر وتىرىك ايتقان، مەن بۇعان سەنىمدىمىن. ايتپاقشى، مەن دۇيسەمباەۆ كلۋبتى رەسمي ەمەس تۇردە باسقاراتىنىن ەستىدىم. ول كوماندامەن بىرگە ساپارلارعا شىعادى، ويىنشىلارمەن كەلىسسوزدەر جۇرگىزەدى.

- ايتپاقشى، توبىلعا كوڭىل اۋدارايىق. ول جاقتان دا جۇمباق كۇيدە كەتتىڭىز. ءسىز جاتتىعۋ جيىندارىنا كەلىپ، جاڭا كەلىسىمشارتقا قول قويۋى كەرەك ەدىڭىز، بىراق ولاي بولمادى.

- ولاي ايتاتىندارعا سەنبەڭىز. مەن كەلدىم، جيىن وتكىزدىم. ولار ماعان كەلىسىمشارت ۇسىندى. بىراق مەن وعان مەنىڭ كوزقاراسىم بويىنشا شاقىرعان ويىنشىلارعا قول قويىلعاننان كەيىن عانا قول قوياتىنىمدى ايتتىم. ولار (جاڭا ويىنشىلار) ماعان كەرەك ەدى، مەن ولار ءۇشىن باسىمدى ءيىپ جاۋاپ بەردىم. بىراق بۇل ورىندالمادى.

- نەگە؟

- سودان كەيىن كلۋب باسشىلىعىندا جاي عانا وزگەرىس بولدى. ءبىز 2012 جىلى نيكولاي پانينمەن بىرگە جۇمىس جاسادىق، بارلىعى جاقسى بولدى. بىراق سودان كەيىن اكىم جاڭا ديرەكتور مەن سپورت ديرەكتورىن شاقىرۋعا شەشىم قابىلدادى. بۇل نەمەن بايلانىستى ەكەنىن بىلمەيمىن. پانين، مەنىڭ ونى قورعاعانىمدى قالاعان بولسا كەرەك. بىراق، قازاقستاندا اكىمنىڭ شەشىمى تالقىلانبايدى، ول مۇنى مەنەن جاقسى بىلەدى.

قوستانايداعى كەزەڭ تۋرالى جاعىمدى ەستەلىكتەر عانا قالدى، بىزدە جاقسى كوماندا بولدى، ءبىز كەرەمەت فۋتبول وينادىق، بىراق ماۋسىمنىڭ سوڭىندا سوت زاڭسىزدىعىنا تاپ بولدىق. اسىرەسە، ەسىڭىزدە بولسا، بۇل «تارازبەن» بولعان قوستانايداعى ويىندا كورىندى. ولار ءبىزدى جانكۇيەرلەرىمىزدىڭ الدىندا اشىق تۇردە ء"ولتىردى". جانكۇيەرلەر اشۋلانعاندىقتان، ءتارتىپ ساقشىلارى سۋديالاردىڭ قاۋىپسىزدىگى ءۇشىن الاڭنان ومون-مەن كەتۋگە ءماجبۇر بولدى. تۋرنيرلىك كەستەدە ءبىز بۇدان الدەقايدا جوعارى بولۋىمىز كەرەك ەدى، بىراق تورەشىلەر ءبىزدى بۇل مۇمكىندىكتەن ايىردى. مۇنى بۇكىل قازاقستان كوردى.

ەندى مەن نۇربول جۇماسقاليەۆتىڭ جۇمىسىن كورىپ، ونىڭ جەڭىستەرىنە قۋانعانىما وتە قۋانىشتىمىن. بىلەسىز بە، مەن "توبىلمەن" كەلىسسوزگە كەلگەندە، ول اكىم قابىلداۋىندا وتىردى. ول مەنى كورگەندە: «ۆيكتوريچ، مەن ەسىڭىزدەمىن بە؟» دەپ سۇرادى. مەن وعان: «ارينە، ءسىز سپارتاكتاعى ءبىزدىڭ بايقاۋىمىزدا بولدىڭىز!» دەدىم.  ول كەرەمەت فۋتبولشى بولدى. ەندى كەرەمەت باپكەر بولادى دەپ ۇمىتتەنەمىن. قالاي بولعاندا دا، مەن وعان شىن جۇرەكتەن وسىلاي بولعانىن تىلەيمىن.

- ەرتىسكە ورالايىق. ءسىزدىڭ ويىڭىزشا، بۇل تەك مەنەدجەرلەر مەن جاتتىقتىرۋشىلاردىڭ عانا ەمەس، فۋتبولشىلاردىڭ دا قاتەلىگى بولۋى مۇمكىن بە؟ قازىرگى ناتيجەلەرگە ولار دا كىنالى شىعار؟

- ەشكىم ولاردان جاۋاپكەرشىلىكتى الىپ تاستامايدى، سەبەبى، ولار جاقسى ويناۋى كەرەك ەدى. بىراق مەن سىزگە ايتايىن: «ەرتىس» تولىقتاي جاۋىنگەرلىك قۇرامعا يە. الايدا، كوشباسشى جەتىسپەيدى. فونسەكا بار، بىراق وعان جالعىز  قيىن. ول الاڭداعى كوشباسشى. بىراق شەشىنۋ بولمەسىندە تىلدىك توسقاۋىل وعان كەدەرگى كەلتىرەدى. كلۋبتى وسىنداي كۇيگە كەلتىرگەن  لاۋازىمدى ادامدار بۇرىن وسىنداي نيۋانستار تۋرالى ويلانۋى كەرەك ەدى. ەگەر ولار باپكەردىڭ جۇمىسىنا ارالاسپاسا، وزدەرىن مامان رەتىندە قالىپتاستىرۋعا تىرىسپاسا، كوماندانىڭ قۇرامىنا كىرىسپەسە، ءتىپتى وڭاي بولار ەدى. سوندا كوپتەگەن قاتەلىكتەردى بولدىرماۋعا بولادى. مەن بۇرىن فۋتبولدى بۇرمالايتىن ەكى نارسە - اگەنتتەر مەن لوتەرەيا ويىندارى دەپ ويلادىم. بىراق قازاقستاندا ءۇشىنشى فاكتور بار - فۋتبولداعى ەشتەڭەنى تۇسىنبەيتىن كلۋبتارداعى باسشىلار.

اۋدارعان "ادىرنا" ۇلتتىق پورتالى

پىكىرلەر