قازاقستان قۇراماسىنىڭ فۋتبولشىسى يسلام چەسنوكوۆ شوتلانديانىڭ «حارتس» كلۋبىمەن كەلىسىمشارتقا قول قويدى. بۇل تۋرالى كوماندانىڭ رەسمي سايتى جازدى، دەپ حابارلايدى «ادىرنا» ءتىلشىسى.
چەسنوكوۆپەن جاسالعان كەلىسىم 2028 جىلعا دەيىن جارامدى. فۋتبولشى جاڭا كلۋبىندا 99-نومىرمەن ونەر كورسەتەدى.
قازاقستاندىق ويىنشى «حارتسقا» قوستانايدىڭ «توبول» كلۋبىنان اۋىسقان. سپورتشى ول جەردە كوماندا كوشباسشىلارىنىڭ ءبىرى بولعان ەدى. 26 جاستاعى فۋتبولشى شوتلاندياعا وتكەن جىلدىڭ جازىندا-اق كەتۋى مۇمكىن ەدى، الايدا ول كەزدە ترانسفەردى راسىمدەۋ مۇمكىن بولماعان. ناتيجەسىندە اۋىسۋ قىسقى كەزەڭگە شەگەرىلىپ، چەسنوكوۆ «حارتس» ساپىنا ەركىن اگەنت رەتىندە قوسىلدى.
يسلام چەسنوكوۆ شوتلانديا پرەمەرشيپىندە (جوعارى ليگادا) ونەر كورسەتەتىن العاشقى قازاقستاندىق فۋتبولشى, سونداي-اق ورتالىق ازيا ەلدەرى وكىلدەرىنىڭ ىشىندەگى تۇڭعىش ويىنشى اتاندى.
ايتا كەتەيىك، «حارتس» چەمپيوناتتىڭ 20 تۋرىنان كەيىن كوش باستاپ تۇر جانە التىن جۇلدە، سونداي-اق ۋەفا چەمپيوندار ليگاسىنا جولداما ءۇشىن تالاسۋدا.
يسلام چەسنوكوۆ – وسكەمەننىڭ «التاي» فۋتبول اكادەمياسىنىڭ تۇلەگى. 2021 جىلى بەلارۋستىڭ «بەلشينا» كلۋبىنا اۋىسىپ، 2023 جىلدان بەرى «توبول» ساپىندا ونەر كورسەتتى. قوستانايلىق كلۋب قۇرامىندا 92 ماتچ وتكىزىپ، 30 گول سوعىپ, 17 ناتيجەلى پاس بەرگەن. قازاقستان ۇلتتىق قۇراماسى ءۇشىن 20 ويىنعا قاتىسىپ، 2 گول اۆتورى اتانعان.
