زاڭسىز لوتەرەيا قىزمەتى مەن ينتەرنەت-كازينوعا قارسى كۇرەستە 6 639 رەسۋرس بۇعاتتالدى. بۇل تۋرالى تۋريزم جانە سپورت مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ۆەدومستۆو زاڭسىز لوتەرەيا قىزمەتىن انىقتاۋ جانە توسقاۋىل قويۋ بويىنشا بەلسەندى جۇمىستى جالعاستىرىپ جاتىر. بيىل جىل باسىنان بەرى زاڭسىز لوتەرەيا ۇيىمداستىراتىندارعا قاتىستى 103 اكىمشىلىك حاتتاما تولتىرىلدى. سوت تالقىلاۋى ناتيجەسىندە 48 جەكە تۇلعا جاۋاپقا تارتىلىپ، قالعان ىستەردى قاراۋ جالعاسىپ جاتىر.
زاڭسىز ينتەرنەت-كازينولارمەن جانە بۋكمەكەرلىك كەڭسەلەرمەن كۇرەس اياسىندا ءتۇرلى ۆەدومستۆولار باس پروكۋراتۋرامەن، قارجى مونيتورينگى اگەنتتىگىمەن جانە ىشكى ىستەر مينيسترلىگىمەن بىرلەسىپ، زاڭسىز قىزمەت بەلگىلەرى بار 11 417 ينتەرنەت-رەسۋرستى انىقتادى. ونىڭ ىشىندە 6 639 رەسۋرس بۇعاتتالدى، 1 237-ءسى وڭدەۋ ساتىسىندا، 1 961-ءى قولجەتىمسىز، 1 353 رەسۋرستا قۇقىق بۇزۋشىلىق بەلگىلەرى جوق، ال 227-ءسىن مەملەكەتتىك تەحنيكالىق قىزمەت پيلوتتىق رەجيمدە بۇعاتتادى.
تۋريزم جانە سپورت مينيسترلىگى ازاماتتاردىڭ قۇقىقتارىن قورعاپ، ونلاين-قىزمەتتەر نارىعىندا ءتارتىپتى قامتاماسىز ەتىپ، سونداي-اق اتالعان سالاداعى زاڭسىز قىزمەتتەردىڭ مونيتورينگى مەن توسقاۋىل قويۋ باعىتىندا جۇمىسىن جالعاستىرادى.
