رەسەي فەدەراتسياسىنىڭ بايلانىس جانە بۇقارالىق كوممۋنيكاتسيالار سالاسىنداعى قاداعالاۋ قىزمەتى قازاقستاندىق قازتاگ سايتىنا قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
روسكومنادزور قازاقستاندىق قازتاگ اقپارات اگەنتتىگىنىڭ سايتىن بۇعاتتاۋدى تالاپ ەتتى. تالاپ اگەنتتىك باسشىلارىنا قاتىستى قوزعالعان قىلمىستىق ءىس تۋرالى ماتەريالدارعا بايلانىستى قويىلعان.
مالىمەتكە سايكەس، رەسەي تاراپى بۇل كونتەنتتى اۆتورلىق جانە ساباقتاس قۇقىقتاردى قورعاۋ شارالارىمەن بايلانىستىرعان. تالاپ قازاقستاندىق حوستينگ-پروۆايدەرگە جولدانعان. الايدا حوستينگ كومپانياسى رەسەيلىك ۆەدومستۆونىڭ تالابىمەن سايتتى بۇعاتتاماعانى بەلگىلى بولدى.
سونداي-اق رەسەيلىك سوت قازتاگ-تى سوت پروتسەسى تۋرالى رەسمي تۇردە حاباردار ەتپەگەنى ايتىلدى. اگەنتتىك بۇل اقپاراتتى سايتقا قولجەتىمدىلىك ماسەلەلەرىنىڭ سەبەبىن انىقتاۋ كەزىندە بىلگەن.
وسى جاعدايعا بايلانىستى قازتاگ قازاقستاننىڭ قۇزىرلى ورگاندارىنا – باس پروكۋراتۋراعا، ۇقك-گە جانە پروفيلدىك مينيسترلىكتەرگە سۇراۋ جولداعان. اگەنتتىك قازاقستان اۋماعىنداعى ينتەرنەت-رەسۋرستاردىڭ شەتەلدىك تالاپتارعا باعىنۋى جانە اقپاراتتىق ەگەمەندىكتى قورعاۋ شارالارى تۋرالى تۇسىنىكتەمە سۇراعان.
حالىقارالىق ۇيىمدار مەن ءسوز بوستاندىعىن قورعاۋ قۇرىلىمدارى بۇل ىسكە الاڭداۋشىلىق بىلدىرگەن.
