كەشە مەملەكەت باسشىسى قاسىم-جومارت توقاەۆتىڭ قاتىسۋىمەن مۇعالىمدەردىڭ جىل سايىنعى ءداستۇرلى تامىز كەڭەسى ءوتتى. جيىندا پرەزيدەنت اعىلشىن ءتىلىن 2-3, ءتىپتى 5 سىنىپتان باستاپ وقىتۋ تۋرالى ۇسىنىس ايتتى. شىن مانىسىندە بالاعا اعىلشىن ءتىلىن قاي سىنىپتان باستاپ ۇيرەتكەن ءجون؟ سونداي-اق بيىلعى كەڭەستىڭ قانداي ەرەكشەلىكتەرى بولدى؟
پرەزيدەنتتىڭ اعىلشىن تىلىنە بايلانىستى ۇسىنىسى كوپشىلىكتىڭ قولداۋىنا يە بولىپ، قىزۋ تالقىلانۋدا. ازاماتتاردىڭ باسىم بولىگى اعىلشىن ءتىلىن 5 سىنىپتان باستاپ وقىتقان ءجون دەگەن پىكىردە. ايتسە دە، «QazBilim» ورتالىعىنىڭ ديرەكتورى اياتجان احمەتجان كوپشىلىكتىڭ بۇل پىكىرىمەن كەلىسپەيدى.
– مەملەكەت باسشىسى قاسىم-جومارت توقاەۆ «اعىلشىن ءتىلىن 3 نەمەسە 5 سىنىپتان باستاپ وقىتايىق» دەپ وتە ورىندى ۇسىنىس جاسادى. سەبەبى 1 سىنىپتان بالانىڭ باسىن قاتىرماي، شەت ءتىلىن 10 جاستان باستاپ وقىتقان ءجون. ايتسە دە الەۋمەتتىك جەلىدەگى ازاماتتار اعىلشىن ءتىلىن 5 سىنىپتان باستاپ وقىتۋ كەرەك دەپ جاتىر. مەنىڭ ويىمشا، اعىلشىن ءتىلى 5 سىنىپتان ەمەس، 3 سىنىپتان باستاپ وقىتىلا باستاۋى كەرەك. ەگەر ءبىز اعىلشىن ءتىلىن 5 سىنىپتان باستاپ وقىتاتىن بولساق، مەكتەپتەگى ورىس ءتىلىنىڭ ىقپالىن ساقتاپ قالاتىن بولامىز. سوندىقتان دا ءبىز اعىلشىن ءتىلى مەن ورىس ءتىلىن 3 سىنىپتان باستاپ قاتار وقىتقان ءجون. ءتىپتى ورىس ءتىلىن 5 سىنىپتان باستاپ وقىتساق تا كوشتەن قۇر قالمايمىز. جالپى قازاق بالاسى ءۇشىن ورىس ءتىلى كوپ تىلدەردىڭ ءبىرى سەكىلدى شەت ءتىلى بولۋى كەرەك. ال اعىلشىن ءتىلىن بالا 10 جاسقا تولعان 3 سىنىپتان باستاعان ءجون، – دەدى ۇستاز.
بۇعان دەيىن زيالى قاۋىم وكىلدەرى «جاپوندار شەت ءتىلىن 12 جاستان باستاپ وقىتادى ەكەن. سوندىقتان دا ءبىز دە اعىلشىن ءتىلىن 5 سىنىپتان باستاپ وقىتۋىمىز كەرەك» دەپ ايتىپ كەلگەن بولاتىن. الايدا بۇل ۇستانىم قازىرگى تاڭدا زامان تالابىنا ساي ەمەس سەكىلدى. سەبەبى بۇگىندە يۋتۋب ارناسى ارقىلى 4-5 جاسار بالالار اعىلشىن تىلىندە ۇيرەنە باستادى. مىنە وسىنداي بالالارعا اعىلشىن ءتىلىن 5 سىنىپقا دەيىن كۇتتىرىپ، وقىتپاي قويۋ ورىنسىز سەكىلدى. ارينە بۇل ماسەلەنى سالا ماماندارى الداعى ۋاقىتتا تالقىلاي جاتار. بىراق زامان تالابىنىڭ وزگەرىپ جاتقانىن مويىنداعان ءجون.
اعىلشىن تىلىنەن باسقا تامىز كەڭەسىندە قانداي ەلەۋلى جاڭالىق بولدى. اياتجان احمەتجاننىڭ ايتۋىنشا، بيىلعى كەلەلى كەڭەستىڭ ەڭ باستى ەرەكشەلىگى – جيىنعا قاسىم-جومارت توقاەۆتىڭ قاتىسۋى بولعان.
– بىرىنشىدەن، پرەزيدەنتتىڭ تامىز كەڭەسىنە ارنايى كەلىپ، قاتىسۋى ۇستازدارعا دەگەن قۇرمەت دەپ بىلەمىن. مۇنى ءوز باسىم زور ريزاشىلىقپەن قابىلدادىم. سونداي-اق، جيىندا مينيستر 2021 جىلدان باستاپ الىپپەنىڭ 1 سىنىپقا ەنگىزىلەتىنىن مالىمدەدى. ەڭ باستىسى ول اتالعان وقۋلىقتىڭ احمەت بايتۇرسىنۇلىنىڭ الىپپەسىنىڭ نەگىزىندە دايىندالاتىنىن ايتتى. بۇل ارينە كوپتەن بەرى سىننان كوز اشپاعان مينيسترلىكتىڭ «بارەكەلدى» دەپ ماقتايتىن ارەكەتى. ۇشىنشىدەن، ءمينيستردىڭ وقۋلىقتاردىڭ قاتەسىز باسىلۋىنا ءمان بەرىپ، باسپالاردىڭ باسسىزدىعىنا كۇرەس اشىپ وتىرعانىن جوعارى باعالايمىن. شىنى كەرەك كەڭەستە كوپشىلىكتىڭ كوڭىلىنەن شىعاتىن كوپتەگەن ماسەلەلەر كوتەرىلدى. ايتسە دە، ءوز باسىم جيىندا ايتىلعان ءتاتتى سوزدەر ناقتى ىسكە اسا ما، جوق پا دەگەنگە الاڭداپ وتىر. ءبىزدىڭ ەلدە جاقسى يدەيالار ايتىلعانمەن ونىڭ ءىس جۇزىنە اسۋى قيىننىڭ قيىنى ەمەس پە؟ جالپى جاس ءمينيستردىڭ مىقتى قولداۋشىسى بولماسا باسپالاردىڭ بارماق باستى، كوز قىستى ارەكەتىنە توتەپ بەرە الماۋى مۇمكىن ، – دەيدى اياتجان احمەتجان.
سوڭعى جىلدارى ءبىلىم جانە عىلىم مينيسترلىگى سىننان كوز اشپاي كەلەدى. جاس ءارى سۋ جاڭا مينيستر اسحات ايماعانبەتوۆ سالاداعى كەمشىلىكتەردى تۇزەي الا ما؟ جالپى تامىز كەڭەسىندە پرەزيدەنت تە، مينيستردە قوعامنىڭ تالاپ تىلەگىنە قۇلاق اساتىنىن اڭعارتتى.
سەرعالي اسلانبەك
"ادىرنا" ۇلتتىق پورتالى
